Ишембай уҡыусылары тәжрибә туплап ҡайтты

Башҡорт Асыҡ КВН Лигаһы рәйесе Урал Салауат улы Кәримов Йәйге КВН мәктәбен сәләмләп, эш программаһы менән һәм иң оҫта мөхәррирҙәр менән таныштырып сараны башлап ебәрҙе. Аҙаҡ, уҡыусыларҙы ике командаға бүлеп, уларға мөхәррирҙәр беркеттеләр. Стендап-комик Нияз Абдуллин һәм Шаян-Лига уйындарын
ойоштороусы Кәрим Хөснуллин үҙ көстәрен һалып, Йәйге Кубок уйынына әҙерләне. Уның араһында филология фәндәре кандидаты, билдәле Шаяниум оҫтаһы Венер Әсмәндияров, Башҡорт Асыҡ КВН Лигаһы мөхәррире Гөлнур Ғаззалова һәм идара рәйесе Урал Кәримов уҡыусыларға үҙ тәжрибәләре менән уртаҡлашып, кәңәштәр бирҙе.

Көндәлек программаға индерелгән, иртәнге ашҡа тиклем, ойоштороусы апай-ағайҙар көндө күңелле зарядка менән башлап ебәрҙеләр, ә кисен бергәләп башҡарған эштәргә йомғаҡ яһанылар.

Уҡыусылар оҫталыҡ дәрестәренән тыш "Тәбиғәтте өйрәнеү" музейында экскурсияла булды. Ҡурсаулыҡта йәшәгән төрлө ҡош-ҡорттарҙың, хайуандарҙың һөлдәләре, йәшәйештәре, урмансыларҙың ниндәй эштәр башҡарыуы тураһында бик күп ҡыҙыҡлы мәғлүмәт белде. Шулай уҡ ҡурсаулыҡта урынлашҡан, Ҡыҙыл китапҡа индерелгән, ҡасандыр махсус рәүештә Алтай яғынан килтерелгән боландарҙы күреп иҫтәре китте.

Йәйге лиганың өсөнсө көнөндә Һарғая ауылындағы "Башһырт" үҙәгендә уҡыусылар ниндәй уңыштарға өлгәшеү һәләтен күрһәтте. Был уйында Сибай ҡалаһынан "Йыуаса", Бөрйәндән "Тян бул", Өфө ҡалаһынан "Юл япрағы", Татарстандан "Туҡай" командаһы һәм шулай уҡ мөхәррирҙәр ике көн әҙерләгән уҡыусыларҙан торған - "Өләсәйҙәр" һәм "Ҡара айыу" көс һынашты. Беҙҙең уҡыусылар Шаяниум оҫталарынан ҡалараҡ өсөнсө урынды бүлеште. Икенсе урынды "Юл япрағы" , ә Йәйге Квн кубогын Татарстандан килгән "Туҡай" командаһына яуланы.

Уйын аҙағында Башҡорт Асыҡ КВН Лигаһы идара рәйесе Урал Кәримов Йәйге КВН мәктәбендә ҡатнашҡандарға сертификаттар тапшырҙы.

Йәйге КВН мәктәбен юғары кимәлдә ойошторған барлыҡ ойоштороусыларға, ашнаҡсы хеҙмәткәрҙәренә рәхмәтебеҙҙе еткереп, яңы тойғолар менән ҡыуанып, яңы үрҙәр яуларға көс-дәрт алып ҡайттыҡ. Шулай уҡ Кинйәбулат урта мәктәбе директоры Шайморат Сәйфулла улы Ғиниәтуллинға ла ҙур рәхмәтебеҙҙе еткерәһе килә. Беҙгә ышанып, мәктәп автобусында йөрөп ҡайтырға ярҙам иткәне өсөн.

Был оҫталыҡ дәресендә алған тәжрибәне октябрь айында Өфөлә үтәсәк Асыҡ КВН Лигаһын уйынында ҡулланырбыҙ тигән ниәттә ҡалабыҙ.