Бурыслымын

Бурысым күп: ғүмер биргән,
Юҡтан мине бар яһаған,
Төн йоҡламай, мине баҡҡан,
Мине көтөп, уттар яҡҡан,
Балам, тиеп, йәнен атҡан,
Хәҙер инде гүрҙә ятҡан
Әсәйемә бурыслымын.

Бурысым күп: исем биргән,
Һөйләшергә тыуған телдә,
Иман, намыҫ, әхлаҡ менән
Көн итергә тыуған илдә
Аҡыл биргән, кәңәш иткән
Фани донъяларҙан киткән
Атайыма бурыслымын.

Бурысым күп: бәләкәйҙән
Абынғанда ҡулдан тотҡан,
Илағанда йәшем һөрткән,
Ғүмерем буйы ярҙам иткән,
Хаталарҙы ғәфү иткән
Ағайҙарым, апайҙарым,
Һеҙҙең алда бурыслымын.

Бурысым күп: ғүмер биргәс,
Тәрбиә һәм белем биреп,
Кәңәшсе һәм терәк булып
Таянысы, йыуанысы
Уңыштарға ҡыуаныусы-
Әсәй булғас, балаларым,
Һеҙҙең алда бурыслымын.

Бурысым күп - зарланмайым,
Йәлләү һорап наҙланмайым,
Еңеллектәр теләмәйем,
Аҡланыуҙар эҙләмәйем,
Бары ошо бурыстарҙан
Ҡотҡарыуҙы теләмәйем.

Фото: https://unsplash.com/