Тән яраһы уңалыр ул, балам,
Үҙ ямауы уның үҙендә.
Тел яраһы сикһеҙ ауыр яра -
Йөйө ҡала барыбер күңелдә.
Һүҙ ҡылыстан үткер ҡорал, балам,
Онтай, ҡыра, вата, бөтөрә.
Өмөтлө лә итә, бәхетле лә,
Ҙурлай һине, күккә күтәрә.
Һүҙ ҡайһы саҡ бысаҡҡа тиң, балам,
Бәғер телә - шундай аяуһыҙ...
Йылан кеүек, йөрәктәрҙе саға,
Ҡаяуы юҡ, саға ҡаяуһыҙ.
Тел тылсымға, мөғжизәгә эйә -
Һөйҙөртә лә һине, көйҙөртә.
Күңелдәргә ағыу булып кереп
Дуҫлыҡ ҡәлғәләрен емертә.
Һүҙҙәреңде үлсәп һөйлә, балам,
Телең өсөн һине һөйһөндәр.
"Сәсән телле, изге, матур һүҙле -
Үҙебеҙҙең башҡорт," - тиһендәр.
+24 °С
Ямғыр
