Дәртле лә, талантлы ла йәш нефтселәр!

Салауат ҡалаһында республиканың көньяғынан 9 уҡыу йорто командаһы менән ярышта беҙҙең студенттар абсолют еңеүсе булды. Улар нимә менән алдырған һуң тиһегеҙме? Йәштәрҙең Башҡортостандың 100 йыллығына арналған концерт программалары һоҡланғыс бай йөкмәткеле, рухлы була. Инструменталь композициялар, үҙебеҙҙең йыр-моң, бейеүҙәр, ҡурайсыларҙың сығыштары жюри тарафынан бик юғары баһалана. Йыл һайын ойошторолған был конкурста нефть колледжы студенттары беренсегә генә уңышлы сығыш яһамай, уларҙы иң сағыу командалар араһында күреп өйрәнгәндәр.

- Колледжда студенттар һәләттәрен үҫтерә алһын өсөн бөтә мөмкинлектәр бар. Рус һәм башҡорт вокал ансамблдәре, “Юрматы” бейеү коллективы, ҡурайсылар ансамблендә тиҫтәләгән егет һәм ҡыҙ шөғөлләнә, - тип уртаҡлашты милли музыка ҡоралыбыҙ - ҡурайҙы һайлаған йәштәрҙе етәкләүсе Кинйә Әхмәҙиев.

Тәжрибәле педагогтар Ирина Гузняева, Артур Мөхәмәтйәнов, Айрат Зиннәтов һәм Кинйә Әхмәҙиев, төп уҡыуҙан тыш, йәштәрҙең ижади офоҡтарын киңәйтеүгә бар күңелен һала. Уҡытыу-тәрбиә эштәре буйынса директор урынбаҫары Марина Колеганованың ойоштороу һәләте лә маҡтауға лайыҡ.

Уңыштар теләйек талантлы, тырыш студенттарыбыҙға,

етәкселәренә - алда уларҙы Өфө,

конкурс-фестивалдең республика кимәлендәге этабы көтә.