“Биғылый” килде беҙгә!

Яңы ғына тап ошондай рухлы тамаша ҡараны ишембайҙар, юҡһа көнкүреш ерлекле, уйын-көлкөгә ҡоролғандарына өйрәнеп бөткәйнек инде. Ундайҙар ҙа кәрәк, әммә стәрлеләр ҡуйған “Биғылый” спектакле яңы һүҙ, яңы ҡараш булып, күңелдәргә үтеп инде, тамашасы зауығына тап килде, тетрәндереп, уйҙарға һалды.

Спартак Ильясовтың күләмле генә романынан бер тынала ҡаралған тамаша әүәләү еңелдән булмағандыр.

Режиссер Айрат Әбүшахмановтың йәштәргә хас ҡыйыулығы, яңылыҡҡа ынтылыуы, артистарҙың һәр береһенең ролдәрҙе яратып, бирелеп уйнауы спектаклдең башынан уҡ һине эләктереп ала ла тамаша бөткәнсе ысҡындырмай.

Төп герой Биктимерҙең яҙмышы ни тиклем аяныслы булмаһын, тормош-тәҡдир ниндәй генә һынауҙар ҡуймаһын, ул бөгөлмәй, һынмай, сөнки ул рухы менән көслө, тыуған ерен, тормошто өҙөлөп һөйөүе менән һоҡландыра.

Ышандырҙы Илнур Атйетәров! Икенсе планда уйнаған ғағауз ҡарттары һуң! Ни тиклем ихласлыҡ, олпатлылыҡ һәм ябайлыҡ! Тамашаның декорацияһы, кейемдәр ҙә үҙенсәлекле, ә тауыш фоны – үҙе бер мөғжизә, бер образ кеүек ҡабул ителә. Эйе, эйе, күренмәгән, әммә бәғерҙәрҙе телгән музыка, айыуҙың ауыр һулышы, һуғыш, паровоз гудоктары, тағы күп төрлө тауыштар сәхнә әҫәрен тулыландыра, көсәйтә. Был кисте бөтә зал бер тулҡында булды, йөрәктәр бергә типте, күптән тамашасыларҙың бындай берлеген күргән юҡ ине.

Ә бит залда ололар менән бер рәттән үҫмерҙәр ҙә, йәштәр ҙә, ҡолаҡтарына наушник кейгән рустар ҙа бар ине. Тамаша тамамланғас та, урындан ҡуҙғалмай, баҫып, оҙа-а-аҡ алҡышланы ишембайҙар!

Беҙ бәхетле, күршелә генә милли театрыбыҙ ижад итә, йыл һайын яңы премьералар менән һөйөндөрә, яңы үрҙәр, яңы табыштар уға.