«МИРАҪ» – ИШЕМБАЙ СӘХНӘҺЕНДӘ!

Башҡортостандың һәм Рәсәйҙең алдынғы профессиональ коллективтарының береһе ул - «Мираҫ». Өфө ҡалаһының йыр һәм бейеү фольклор ансамбле үҙ исеменә ярашлы ижад итә: бай мираҫыбыҙҙы сайпылдырмай халыҡҡа еткерә, сағыу бейеү һәм йырҙары менән күңелдәрҙе күтәрә, рухыбыҙҙы нығыта. Ансамблдең концерттарында бейеү төркөмдәре, хор һәм уйын ҡоралдары оркестры - бөтәһе бергә тамашасыға ысын байрам бүләк итә. “Мираҫ” баш ҡалабыҙҙың ғына түгел, республикабыҙҙың да йөҙөк ҡашына әүерелде.

“Мираҫ”тың репертуарында 100-ҙән ашыу бейеү бар: во-каль композициялар, хор һәм яңғыҙ сығыштар. Репертуарҙың нигеҙенә республикала йәшәгән халыҡтың бейеүҙәре һәм йырҙары һалынған. Ә иң ҡыуаныслыһы: улар башҡорттоң милли сәнғәтенә һәр ваҡыт тоғро. Һәр бейеүҙәрендә Башҡортостаныбыҙҙың күркәмлеге, байлығы, халҡының ғорурлығы, холоҡ-фиғеле сағыла. ”Мираҫ” – бейеү ансамбле генә түгел, ә вокал, хор һәм халыҡ уйын ҡоралдары оркестрын бергә туплаған ижади коллектив. Уларҙың һәр сығышы музыкаль-хореографик сюжетҡа, темаға ҡоролған, әҫәрҙәр бер-береһенә үрелеп, байытылып, матур театрлаштырылған тамашаны тыуҙыра. “Мираҫ” барлыҡҡа килгәндән алып үҙенең репертуары менән миллионлаған тамашасының йөрәгенә үтеп инеп, үҙ урынын алған. Баҫҡанында ут сәсеп, осҡон уйнатҡан аҫыл егеттәр, һығылмалы, зифа буйлы һылыу ҡыҙҙар – халыҡ уларҙы бигерәк тә ихласлығы өсөн үҙ итә.

Республикабыҙҙа һәм Рәсәйҙә генә түгел, донъя кимәлендә лә танылыу яулап өлгөргән ижади коллектив бик тиҙҙән Ишембай халҡына зауыҡлы һәм бай та-маша бүләк итәсәк. ”Мираҫ”тар менән осрашыуҙан ситтә ҡал-мағыҙ, уларҙың иҫ киткес матур сығыштарын ҡарап, күңелегеҙгә дәрт, йөрәгегеҙгә ял, рухи аҙыҡ алып ҡайтығыҙ! Концерт 12 февралдә ҡала мәҙәниәт һарайында киске сәғәт етелә башлана.