Ҡала ағинәйҙәре берләште

Республика «Ағинәйҙәр» клубының Ишембай ҡалаһы филиалы күптән түгел үҙ эшен башлап ебәрҙе. Уны районда ғына түгел, республикала билдәле шәхес Хаят Сәғит ҡыҙы Йосопова етәкләй.

- Милли йолаларыбыҙҙы тергеҙеү, йәштәргә рухи ҡомартҡыларыбыҙҙы тапшырыу, йәмғиәттә үҙ һүҙебеҙҙе

әйтеү маҡсатында берләштек, - ти Хаят Сәғит ҡыҙы. - Ишембай милли мәҙәниәттәр үҙәгендә һәр шишәмбе көндөҙгө сәғәт 11-ҙә һәм кесаҙна көндөҙгө сәғәт 3-тә йыйылабыҙ. Бына әле бергәләшеп түшелдеректәр тегә башланыҡ, артабан милли биҙәктәр менән күлдәктәр ҙә тегеп кейербеҙ, тип торабыҙ. Эшләйһе эштәр күп, ҡулдан килгәндә, дәрт-дарман барҙа ҡалабыҙ тормошон йәнләндереүгә үҙ өлөшөбөҙҙө индерәйек тибеҙ. Шуға шиғри йөрәкле, йыр-моңға ғашиҡ әүҙем ҡатын-ҡыҙҙарыбыҙҙы үҙебеҙгә саҡырабыҙ.