Йырсы үҫеп килә

“Барыбер йырлайым, өйрәт!” - 10 йәше яңы тулған Азамат Рәхмәтуллиндың был һүҙҙәрен берәй заман, инде ҙур артист булғас, көлә-көлә иҫләрҙәр әле.

Ошо көндәрҙә Сәйет Билалов репертуарынанйырҙар башҡарыусылар араһында интернет конкурста өлкәндәр менән бер тиң ҡатнашып, 1-се урын яулаған ныҡышмал малайға тәүҙә әсәһен шулай “ҡамауға алырға” тура килә.

Гөлназ Марат ҡыҙын, ҡалалағы Балалар сәнғәт мәктәбенең вокал уҡытыусыһы булараҡ, күптәребеҙ белә. Уҙған йыл уның уҡыусыһы Ләйсән Ғибаҙуллина “Сулпылар” республика телевизион йыр конкурсында Гран-при яулағайны. Гөлназ менән Айбулат Рәхмәтуллиндарҙың ишле, күркәм ғаиләһендә Азамат - икенсе бала.

- Ағаһы музыка мәктәбен уңышлы тамамланы, әммә Азамат кеүек ныҡышып йырларға өйрәттергәнен хәтерләмәйем. Уҡыусыларыма күп ваҡыт, көс киткәнгәме, үҙ балаларымды быға ылыҡтырырға тырышманым. Күрәһең, тәбиғәт үҙенекен итә, - ти әлеге көндә дүртенсе сабыйы менән декрет ялында булған Гөлназ. – Азамат осраҡлы ғына йырлай башланы. Мәктәбендә былтыр Республика көнө айҡанлы сараға әҙерләнәләр ине, класс етәксеһе, беҙҙән йыр кәрәк, үҙегеҙ йырлағас, Азамат та булдырыр, ярҙам итегеҙ, тип мөрәжәғәт итте. ”Беҙҙең ил” йырын өйрәтергә тура килде. Хәҙер Азамат үҙе уҡыған 2-се башҡорт гимназия-интернатының бер йондоҙсоғо.

Үҙенең дәрте булғас, әсәһе Азаматты быйыл “Сулпылар” конкурсына ла әҙерләгән. Бөтәһе 118 бала ҡатнашҡан мәртәбәле саранан кисерештәр онотолмаҫлыҡ.

- Финалға тиклем килеп етеп, төшөп ҡалдым. Жюри алдында әҙерәк шөрләтте, хәҙер үҙеңде нисек тоторға кәрәклекте аңланым – тағы ҡатнашасаҡмын! - ти тәүҙә был хәлде ауыр кисергән йәш йырсы.

– Сәйет Билалов йырҙарын башҡарыуға конкурс хаҡында белгәс тә, дәртләнеп китте. Йырҙары еңел түгел, ололар ҡатнаша, тип тә ҡараныҡ. Һөҙөмтәлә ике көндә “Катерина” йырын өйрәнеп, видеоһын һалдыҡ. Ильяс Кинйәғолов тиҙ генә көйөнөң минусын яҙҙырып бирҙе, уға ҙур рәхмәт. Республика кимәлендәге был конкурста 28 кеше араһында Азаматтың 1-се урын алыуы тураһында хәбәрҙе бик ҡыуанып ҡабул иттек. “Сулпылар”ҙан һуң ҡанаттары һынманы улымдың, баланың шәхесен аңлауға, дәртен үҫтереүгә үҙемә лә бер һабаҡ булды.

Аңлап тораһығыҙ, Азаматтың йыр сәнғәтенә әле юл башы ғына. “Мине үҙеңә уҡырға ал!” - тип тә әйтеп ҡуйған әсәһенә. Бала ошо юлдан артабан китерме, әллә башҡаһын һайлармы - уныһы үҙ иркендә. Ныҡышмал, сәмле малайға күмәкләп уңыштар теләйек! Әйткәндәй, уның башҡарыуында йырҙы “Торатау”ҙың Бәйләнештәге төркөмөндә (https://vk.com/gazeta_toratay) тыңлап була.