Парта артына ултырҙы ғаиләләр

Халыҡтар берҙәмлеге көнө уңайынан Үрге Әрмет мәҙәниәт йортонда “Берҙәм татыу ғаилә - илемә, халҡыма терәк” тип аталған бик матур, фәһемле сара үтте.

Дәрес формаһында ойошторолған был кисәлә ауылыбыҙҙың дүрт йәш ғаиләһе ҡатнашты. Ата-әсәләр балалары менән бергә парта артына ултырып үҙҙәрен төрлө яҡтан һынап ҡаранылар. Мәҫәлән, туған тел дәресендә мәҡәлдең икенсе өлөшөн әйтеп бөтөрөү, балаларыңа ҡушҡан исемгә аңлатма биреү, математика дәресендә һанлы йомаҡтарҙы сисеү, педагогикала - бала тәрбиәләү алымдары, бала һәм ата-әсә араһындағы мөнәсәбәт буйынса ихлас фекерҙәр алышып, йәнле итеп аралашып ултырҙылар, уҡытыусының һорауҙарына яуап бирҙеләр.

Физкультура дәресендә иһә ата-әсәләр “дартс”та үҙ көстәрен һынаны, балалар тупты ҡулсаға ырғытып мәрәй йыйҙы. Хеҙмәт дәресе кергәндә ғаиләләр кем уҙарҙан тиҙ һәм матур турарға тырышып винегрет салатын әҙерләне. Ә бына алтынсы булып кергән музыка дәресендә һәр ғаилә берәр музыкаль номер күрһәтергә тейеш ине. Иң аҙаҡҡы “тәрбиә” дәресендә ғаиләләр конверт эсенә йәшеренгән хәрефтәрҙән тиҙ генә “Ғаиләләр берҙәм, татыу булһын!” тигән һөйләмде төҙөп өлгөрөргә тейештәр ине.

Йәш ғаиләләрҙең “дәрестәрҙә” нисек ҡатнашып ултырыуҙарына Әрмет ауыл биләмәһе хакимиәте белгесе Гөлдәр Әүхәт ҡыҙы етәкселегендәге жюри баһалама бирҙе. Шулай итеп, беренсе урын - дүрт балалы Сәғиҙуллиндарҙа! Икенсе урында – Симкиндар, ә бына өсөнсөнө - ике ғаилә бүлеште - Әбсәләмовтар һәм Мостафиндар. Ауыл хакимиәте ата-әсәләргә һәм балаларға бик матур бүләктәр әҙерләгәәне. Мәҙәниәт хеҙмәткәрҙәре лә ғаиләләрҙе буш ҡалдырманы.

Был матур сара күңелле сәй табыны менән тамамланды.