ХӘТЕР ҘӘ, ХӨРМӘТ ТӘ, ӨМӨТ ТӘ сағылды Ғүмәрҙә үткән “Һаумыһығыҙ, ауылдаштар!” байрамында

Әммә донъя гел һынауҙарҙан тормай. Ҡара көндәрҙе аҡтары алмаштыра. Тормош дауам итә. Бәхет ишәйтеп, бәхет теләп, ғүмәрҙәр ишле-ишле ғаилә булып йәшәгән һәм йәшәй. Бынан 65 йыл элек Хәбирә менән Әҡсән Мөхәмәтйәновтар ҙа үҙ усағын тоҡандырып ебәргән. Байрам мәлендә уларҙы тәбрикләү ҙә сараға ҙур мәғәнә өҫтәне. Алты балаға ғүмер биреп, үҙҙәрен ауыл үҫешенә арнаған кешеләр улар – Мөхәмәтйәновтар. Балалары башлы-күҙле булып, матур итеп донъя көтә, үҙ эшен, тормошта үҙ урынын тапҡандар. Ә ошо сарала яҡындарын тәбрикләп йырлаған Сәғит Мөхәмәтйәновтың атаһы һымаҡ моңло ла, һүрәт төшөрөргә лә оҫта икәнлегенә инанылды. Хәбирә инәй колхоз эшендә янһа, ғаилә башлығы ғүмер буйы ғүмәрҙәргә белем биргән. Уның нисәмә быуын уҡыусылары рәхмәтле булыуын әлеге сарала ла күрергә мөмкин ине. Ҡуш ҡуллап күрештеләр, ҡосаҡланылар, иңенән яратып та киттеләр тәүге уҡытыусыларын, кемдер күҙ йәштәрен дә һөртөп алды.

- Мәктәп гөрләп торҙо, уҡыусыларыбыҙ менән ғорурландым һәм әле лә һоҡланам, - тип хәтирәләре, ҡыуаныстары менән уртаҡлашты мәғариф ветераны. Ысынлап та, ниндәй ҙур исемдәр биргән бит был ауыл. Кемдер ауыл хужалығында алдынғы, кемдер ғалим-физик, медицина, юстиция, күптәре мәғариф, ижад өлкәһендә яҡтылыҡ өләшеүселәр: Вафа Әхмәҙиев, Рауил Ниғмәтуллин, Салауат Кәримов, Салауат Хәйбуллин, Салауат Арыҫланов, Әмир Мәҡсүтов, Гөлназ Әхмәҙиева, Рәйсә Күзбәкова, Гөлшат Әхмәтова... Хәйер, был исемлектең осона сығырлыҡ та түгел һымаҡ. Кескәй генә ауылдан ҙур таланттар ағылған да ағылған. Бөгөнгө белем биреү стандарттарында баланың һәләтен үҫтереп уҡытыу алымын әле бынан илле йыллап элек үҙ эшендә ҡулланған Әҡсән Мәғәфүр улының да роле барҙыр бында. Ә исеме менән район премияһы булдырылған, данлыҡлы педагог, һуғыш һәм хеҙмәт ветераны Ғайса Кәримов нисәмә уҡыусыһына ҡанат ҡуйған шәхес! Иң мөһиме: ошо шәхестәрҙе ауылдаштарының ғына түгел, район, республика ғорурлығы тип тә беләбеҙ.