"КҮРШЕ ХАҠЫ –ТӘҢРЕ ХАҠЫ"

Халҡыбыҙҙың ошо аҫыл мәҡәлен хәтерҙә тотоп, маҡарҙар Ибрай, Һарғай, Иҫәкәй ауылдары халҡын ҡунаҡҡа саҡырҙы.

Оло байрамдар урыны булған Ауҙаҡан яланы был көн гөрләп торҙо. Һәр ауыл алдан тирмәләр ҡорған, һөнәрҙәрен, йыр-бейеүгә маһирлыҡтарын күрһәтергә әҙерләнгән.

Сара халҡыбыҙға хас күркәм йоланан – Маҡар ауылы имам-хатибы Юлай Йомағужиндың фатихаһы менән башланып китте. Байрамды талантлы йәш ғаилә, М. Ғафури исемендәге Башҡорт дәүләт драма театры артистары, сығышы менән Һарғай ауылынан Азат Вәлитов менән кәләше Нурзидә алып барҙы. Район хакимиәтенең эштәргә идарасы вазифаһын башҡарыусы Руслан Кәримов барыһын да ихлас сәләмләп, биләмәләге халыҡ берҙәмлегенән күп нәмә тороуын билдәләне.

- Эштә берҙәм халыҡ матур ял да итә белә, биләмә үҫеше өсөн һәр ауыл халҡының үҙ башланғыстары, изге ниәттә булыуы мөһим. Бөгөн ошо дәртте, татыулыҡты күреү шатлыҡлы, - тине Руслан Радик улы ауыл уңғандарын айырым тәбрикләүгә күсеп.

Күптән түгел 90 йәшен билдәләгән Ғәтифә инәй Хәсәнова, 60 йыл бергә татыу ғүмер иткән Финә һәм Иманғол Дәүләтшиндар һәм тап ошо байрам көнөндә никахлашҡан Васильевка ҡыҙы Анастасия менән Маҡар егете Марат Вәлиәхмәтовтар сәхнә түренә саҡырылды. Оло быуын намыҫлы хеҙмәт, бер-береңә тоғролоҡ өлгөһө күрһәтһә, ауыл киләсәге - тыуған ерендә төпләнгән йәштәрҙә. Биләмә хакимиәте башлығы Әлфир Әлмөхәмәтов, яҡташтарын байрам менән ҡотлап, ошо сараны ойоштороуҙа ҙур ярҙам күрһәткән ауыл старосталарын – Маҡарҙа Илдар Фәтиев, Иҫәкәйҙә Рәфил Алтынбаев, Ибрайҙа Ғаяр Солтанғужин һәм Һарғайҙа Ғайзулла Усмановтың тырышлығын баһаланы. Биләмәлә үткәрелгән һәр сараға әүҙем ҡушылған, ҡулдан килгәнсә ярҙам иткән урындағы эшҡыуарҙар, йәмәғәт ойошмаларын етәкләүселәр, мәғариф, һаулыҡ һаҡлау, мәҙәниәт өлкәләрендә ауыл халҡына хеҙмәт иткәндәр рәхмәт хаттары менән бүләкләнде.

Ҡунаҡ ҡаршылау йолаһын сәхнәләштергән маҡарҙар бер-бер артлы байрамға килгән күршеләрен сәхнә уртаһына саҡыра торҙо. Ана, иҫәкәйҙәр ат егеп, арбалағы хуш еҫле бесән өҫтөнә ултырып килеп еткән. Күстәнәскә ул бауырһағы, мейестән яңы сыҡҡан ауыл икмәге, ул ҡымыҙы, буҙаһы... Ә ибрайҙар, ауылда мәҙәниәт йорто юҡлығына төртмәле шиғырҙар яҙып, сәхнә күргәндәй булайыҡ әле тип, барыһын дәртләнеп бейергә төшөрҙө. Һарғайҙарҙың гармунға ҡушылып халыҡсан йырҙар яңғыратыуы тағы бер һоҡландырҙы. Дүрт ауыл таланттарының бер сәхнәлә сығышы онотолмаҫ тәьҫораттар ҡалдырҙы – күрше булғас, шулай булһын ул!

Тыуған ауылы Маҡар тарихын төплө өйрәнгән яҡташыбыҙ, танылған журналист Фаяз Йомағужиндың биләмәгә ҡараған ауылдар тарихы хаҡында ла белешмә биреүе фәһемле булды. Смаҡай, Урман-Бишҡаҙаҡ ағинәйҙәренең маҡарҙарға теләктәшлегенә, сығыштары менән байрамды йәмләүҙәренә рәхмәт. Иҫәкәйҙән Рәмилә Хәкимова кеүек тотош ғаилә менән байрамға килеп, ейән-ейәнсәрҙәре сығышы өсөн ғорурланып ултырған өләсәйҙәр ҙә байтаҡ булды.

Көн үтә ҡыҙыу тороуына ҡарамаҫтан, спорт ярыштары, халыҡ уйындары, милли көрәш байтаҡ ҡатнашыусыны йыйҙы – еңеүселәргә бүләктәре лә матур ине. Яҡташыбыҙ, билдәле эшҡыуар Радик Солтанов ауылдаштарын байрам һайын оло ҡаҙан тәмле былау менән һыйлау йолаһына был юлы ла тоғро ҡалды. Усаҡ еҫтәре, йыр-моң, уйындар - халыҡҡа ирәйеп ял итеү мөмкинлеге булды.

Берҙәмлектә – көс, ти халыҡ мәҡәле. Байрам асылын аңлағандар тормош дәртен артабан да егәрле, булдыҡлы ҡулдарынан ысҡындырмаҫ.