БЕР-БЕРЕҢӘ ТАЯНЫС БУЛЫП ЙӘШӘГӘНДӘ, ЭШТЕҢ ИҢ АУЫРЫ ЛА ҠУРҠЫТМАЙ

ти 47 йыл бергә татыу ғүмер иткән Ләлә һәм Юрис ҒАРИФУЛЛИНДАР.

Маҡар ауылының матур ҙа, өлгөлө лә Ғарифуллиндар ғаиләһе – Юрис Сабир улы һәм Ләлә Ғәни ҡыҙы хаҡында иң тәүҙә намыҫлы хеҙмәт йылдары,тәрбиә көҙгөһө булған уңған балалары һөйләй.

Юрис Сабир улы 1945 йылдың 13 октябрендә Маҡар ауылында тыуған. Ауылда урта мәктәпте тамамлағас, Стәрлетамаҡ төҙөүселәр техникумына уҡырға инә. Уҡып бөткәс инде Ҡариҙел районына эшкә ебәрелә, әрме хеҙмәтен Алтай өлкәһендә үтә. Унан йәш егет тыуған ауылына ҡайтып, урман хужалығында столяр булып, һуңынан Петровскиҙа эшләй. 1972 йылда белемле, ныҡышмал, халыҡ менән уртаҡ тел таба белгән Юрис ағай Маҡар ауыл советына эшкә саҡырыла. 2006 йылға тиклем, 30 йылдан ашыу, эштәр менән идара итеүсе вазифаһында эшләп, хаҡлы ялға сыҡты ул.

Тормош иптәше Ләлә Ғәни ҡыҙы 1946 йылдың август айында Йәнырыҫ ауылында донъяға килгән. Тыуған ауылында урта мәктәпте тамамлағас, Стәрлетамаҡ педагогия институтының физика – математика факультетына уҡырға инә. Эшкә йүнәлтмә буйынса ғүмерлеккә тормошо бәйләнәсәк Маҡар мәктәбенә эшкә килә ул. 2001 йылға тиклем балаларға математика уҡытты, был осорҙа уҡығандар яратҡан уҡытыусыларын рәхмәт һүҙҙәре менән иҫкә ала.

Һоҡланғыс пар 1971 йылдың 31 декабрендә өйләнешеп, өс ҡыҙға һөйөклө атай-әсәй, ете ейән-ейәнсәргә олатай-өләсәй булып, ауылда 47 йыл бергә татыу тормош көтә. Артабан да донъяны йәмләп, йәштәргә өлгө булып, оҙон-оҙаҡ бәхетле йәшәргә насип итһен һеҙгә!