Әсәйҙәргә наҙ, моң бүләк иттегеҙ!

Әлбиттә, конкурс шарты буйынса социаль селтәрҙә еңеүсене 1 декабрь үк иғлан иттек. Түбәнге Әрмет ауылынан Минебай Хәлитов иң күп лайк-йөрәк (1247) йыйып, лайыҡлы рәүештә еңеп сыҡты. Дәртле, сәмле яҡташыбыҙ гармунда нисек өҙҙөрөп, күңелдәрҙе нисек яулаһа, шәп бүләгебеҙ – “Юрматы мебеле”нән (https://vk.com/yurmaty_mebel) ҡупшы ғына өҫтәл артынан да шулай елдереп килеп етте. Йорт йыһаздарының төрлөһөн етештергән предприятиеның Бульвар урамы, 33-сө йорт адресы буйынса магазинына барып, өҫтәлде еңеүсегә күңелле генә тапшырып ҡайттыҡ. Минебай ағайға алдан шылтыратып, телевидение төшөрә, гармуныңды үҙең менән алһаң ине, тигәйнек - инәлтеп торманы, мебель салонында гармун уйнап, яратҡан йырын һуҙҙы.

- Әсәйҙәр байрамы алдынан бик күңелле, матур сара булды был конкурс. “Торатау”ға ошондай йүнәлештә артабан да уңыштар теләйбеҙ, конкурстарҙың төрлөһөн ойоштороп тороғоҙ. Атайымдың видеоһы өсөн тауыш биргә яҡындарға, ауылдаштарға ҙур рәхмәт, уның йыры ихласлығы менән алдырҙы тип уйлайым. Ул ирекле янғын һүндереү командаһында яуаплы эшенән тыш бар мәҙәни сараларҙа ҡатнаша, спектаклдәрҙә уйнай. Әлеге тамашалар тыйылған осорҙа конкурс күңелдәрҙе ҡандырҙы тиергә була. Аҙаҡҡа тиклем ныҡ тулҡынландыҡ, районыбыҙҙа шул тиклем таланттар күп икән! – тип уртаҡлашты еңеүсенең ҡыҙы Илүзә.

Эйе, конкурстың маҡсаты ла ошо ине – үҙебеҙҙең таланттарҙы күреү, бергәләп әсәйҙәргә йыр-моң бүләк итеү. Ысындан да, һәр бер ҡатнашыусы айырым рәхмәт һүҙенә лайыҡ. Еңеүсенән саҡ ҡына ҡалышып, Ишембай сәнғәт мәктәбенең вокал уҡытыусыһы Гөлназ Рәхмәтуллина башҡарыуында «Усағыңдың уты һүнмәһен» йыры 1162 лайк йыйҙы. Милли мәҙәниәттәр үҙәгенең художество етәксеһе Раушания Вәлиева, Маҡар мәҙәниәт йорто мөдире Гөлиә Көмөшбаева, Көҙән мәҙниәт йорто мөдире Айгөл Хәйретдинованы билдәләп үтке килә - улар конкурсҡа иң күп видео ебәреүселәр. Халыҡ милли мәҙәниәттәр үҙәгенең “Дуҫлыҡ” башҡорт халыҡ вокаль ансамбле солисткаһы Минзилә Ваһапова башҡарыуында “Апай” йырын ихлас ҡабул итте (597 лайк), Сәлих ауылынан Вәли Ғәлиевтың яҙмаһын төркөмдәштәр яратты (994 лайк). Уның яҙмаһын 11 662 кеше ҡараған! «Йөрәктәр” һаны буйынса ауылдашым Минебай Хәлитовты ҡыуып етеп булмаҫын белһәм дә ошо видеояҙма «Торатау» гәзите төркөмөндә торһон әле, йәме. Әсәйемдең был донъяла булмауына теүәл 10 йыл. Был йырым уның һәм башҡа мәрхүмә әсәйҙәрҙең яҡты рухына бағышлана. «Әсәйһеҙ ҡалғас». Зифа Нагаева репертуарынан» – Үрге Әрметтән Фәрзәнә Ғиззәтуллина видеоһын ошо яҙыу менән ебәреп, хисләндерҙе, хатта илатты.

Маҡарҙан Шәрифә Юлғотлинаның «Йөрәгем дауалары» йырын да яҡташтарыбыҙ яратып ҡараны.

Шуныһы ҡыуаныслы, конкурсҡа айырым йыр башҡарыусыларҙан тыш байтаҡ ҡына коллективтар ҙа ҡушылды: «Смаҡай ынйылары» ансамбле, Биксән мәҙәниәт йорто ансамбле, Ә.Вәлиди исемендәге 2-се башҡорт гимназия-интернатының 4В класы уҡыусылары, Биксән ауылының «Тирмәкәй» мәктәпкәсә төркөмө, Ҡанаҡай балалар баҡсаһының мәктәпкәсә йәштәге төркөмө, Ҡанаҡай балалар баҡсаһы хеҙмәткәрҙәре, Этҡол урта мәктәбенең 1-се, 2-се, 3-сө класс уҡыусылары – һеҙ барығыҙ ҙа булдырҙығыҙ! Рәхмәт, балалар, ижади ҡарашлы, дәртле уҡытыусыларығыҙҙан, тәрбиәселәрегеҙҙән уңғанһығыҙ!

Шуныһы ла иғтибарға лайыҡ: төркөмдә иғлан иткән конкурсты ишембайҙар ғына түгел, башҡа район вәкилдәре лә күтәреп алды. Баймаҡ районы Ғәҙелбай ауылынан Гөлшат Ғәлина, Баймак районы Темәс ауылынан Ибраһимова Разалия һәм Алина Йосопова, тыуған яғы менән бәйләнеште өҙмәгән яҡташыбыҙ - Күгәрсен районы Йомағужа ауылында йәшәүсе Нәйлә Әхмәтгәрәева – һеҙҙең ҡатнашлыҡ конкурстың мәртәбәһен күтәрҙе!

Барығыҙға ла һаулыҡ, күңел бөтөнлөгө теләйбеҙ, күңелдә йыр, дәрт булһын, изге хис-тойғоларҙы экрандар аша булһа ла бер-беребеҙгә юллап, аралашып йәшәгәндә вирусҡа бирешмәҫбеҙ!