Гәзит кенә тимәйек, төптәнерәк уйлайыҡ!

Киләһе йылға матбуғатҡа яҙылыу осорон мөмкин тиклем һөҙөмтәле үткәреп ебәреү бурысы тора. Тик ҡайһы беребеҙ был йөкләмә редакциялар иңендә генә тип хаталана. Туған телебеҙҙә баҫылған гәзиттәрҙе, журналдарҙы алдырып уҡыусылар кәмергә түгел, артырға тейеш! Сөнки ошо юл аша ла беҙ телебеҙгә, мәҙәниәтебеҙгә ихтирамды, башҡорт телендә нәшер ителгән баҫмаларҙың үҙ халҡына кәрәк булыуын күрһәтәбеҙ!

Уйлап ҡараһаң, ярты йылға бер сыҡҡан аҡса хаҡы менән беҙ туған телебеҙҙе, туған мөхитебеҙҙе үҫтереүгә үҙ өлөшөбөҙҙө индерәбеҙ. Ошонан сығып ҡараһаҡ ине был эшкә. Әлеге көндә “Торатау” гәзитенә почта аша ярты йылға яҙылыу 985 һум 32 тин тора. Ташламаларға хоҡуҡлы булғандар өсөн – 808 һум да 61 тин.

Ҡаланың үҙендә һәм ТирмәнЙылға, Смаҡай, Кузьминовка кеүек ҡала яны ҡасабаларында йәшәүселәр өсөн гәзиткә редакцияға килеп яҙылыу отошло буласаҡ – Совет урамы, 88-се йорт, 1-се ҡат. Был осраҡта, почта хеҙмәттәрен үҙ иңебеҙгә алғанға күрә, гәзиткә яҙылыу осһоҙораҡҡа төшә: ташламалар менән ҡулланыусылар өсөн - 681 һум, ҡәҙимге хаҡы – 705 һум. Аҙнаһына ике тапҡыр, гәзит сыҡҡан шишәмбе һәм йома көндәре, уны редакциянан килеп алырға ризаһығыҙ икән - 566 һум торасаҡ. Редакция почтальонын үҙегеҙгә саҡыртып яҙылыу мөмкинлеге лә бар, бының өсөн 4-11-80 телефон һандары буйынса мөрәжәғәт итегеҙ.

“Торатау” гәзитенә яҙылыусылар араһында йылына ике тапҡыр бүләк отош та үткәреп киләбеҙ. Быйыл да бер тос ҡына бүләк оттороуҙы матбуғатҡа яҙылыу компанияһы йомғаҡланған мәлдә – декабрь аҙағында ойошторасаҡбыҙ. Ә әлегә, быға тиклем дә хәбәр итеүебеҙсә, һеҙҙе вағыраҡ, әммә көнкүрештә бик тә кәрәкле бүләктәр менән дәртләндерәйек тинек. “Аҙна бүләге” акцияһын 1 ноябрҙән иғлан иткәйнек, тик тәүге аҙна квитанциялар әҙерәк килеү арҡаһында отошто һуңғараҡҡа ҡалдырҙыҡ. Һәм бына улар, ноябрҙең тәүге ике аҙнаһы еңеүселәре – Уразбай ауылынан Камалов Вәли һәм Ишембайҙа йәшәүсе гәзит уҡыусыбыҙ Нурғәлиева Р.Ю. Редакцияға борондан хеҙмәт иткән “барабан”дан егермеләгән квитанция араһынан нәҡ һеҙҙекеләр сыҡты! Аҙна бүләген отоусыларға уранып ятырлыҡ тигәндәй матур мунса таҫтамалдары бүләк итәбеҙ. Мөмкинлек табып, бүләгегеҙҙе дүшәмбе көн (16 ноябрь) төшкә тиклем килеп алыуығыҙҙы һорайбыҙ.

Бына шулай дуҫтар, гәзиткә яҙылыуығыҙ була, квитанцияларығыҙ күсермәһен, фотоһын беҙгә һала һалығыҙ! Юлын беләһегеҙ: [email protected] электрон почта адресына йәки WhatsApp ҡушымтаһы аша 8-989-954-78-38 номерына. Районда почта хеҙмәткәрҙәре лә ауылдаштарын бүләк отошта ҡатнашыуға дәртләндерер тип ышанабыҙ.

Ололарға квитанциялары күсермәһен ебәреүҙә, бәлки, ярҙам да кәрәк булыр. Гәзит-журналдарыбыҙға яҙылайыҡ, уҡыйыҡ, башҡорт баҫмаларын бергәләп күтәрәйек!