Һәр йортҡа үҙебеҙҙең гәзит-журналдар килһен!

2021 йылдың тәүге яртыһына матбуғатҡа яҙылыу осорон мөмкин тиклем һөҙөмтәле үткәреп ебәрһәк ине. “Башҡорт баҫмалары һәр өйҙә булһын!” тигән оран тиктән генә түгел ул. Туған телебеҙҙә баҫылған гәзиттәрҙе, журналдарҙы алдырып уҡыусылар кәмемәһен ине, сөнки был үҙ телебеҙгә, мәҙәниәтебеҙгә ихтирамдың бер мөһим күрһәткесе булып тора. Уйлап ҡараһаң, ярты йылға бер сыҡҡан аҡса хаҡы менән беҙ туған мөхитебеҙҙе үҫтереүгә үҙ өлөшөбөҙҙө индерәбеҙ. “Торатау” гәзитенә почта аша ярты йылға яҙылыу әлеге көндә 985 һум 32 тин тора. Ташламаларға хоҡуҡлы булғандар өсөн – 808 һум 61 тин.

Ҡалала һәм Тирмән-Йылға, Смаҡай, Кузьминовка кеүек ҡала яны ҡасабаларында йәшәүселәр өсөн гәзиткә редакцияға килеп яҙылыу отошло буласаҡ – Совет урамы, 88-се йорт, 1-се ҡат. Был осраҡта, почта хеҙмәттәрен үҙ иңебеҙгә алғанға күрә, гәзиткә яҙылыу осһоҙораҡҡа төшә: ташламалар менән ҡулланыусылар өсөн - 681 һум, ҡәҙимге хаҡы – 705 һум. Аҙнаһына ике тапҡыр гәзит сыҡҡан көндәрҙә редакциянан килеп алырға ризаһығыҙ икән - 566 һум. Редакция почтальонын үҙегеҙгә саҡыртып яҙылыу мөмкинлеге лә бар, 4-11-80 телефон һандары буйынса мөрәжәғәт итегеҙ.

“Торатау” гәзитенә яҙылыусылар араһында йылына ике тапҡыр бүләк отош та үткәреп киләбеҙ. Быйыл да бер ҙур бүләкте матбуғатҡа яҙылыу компанияһы йомғаҡланған мәлдә – декабрь аҙағында ойошторасаҡбыҙ. Ә әлегә һеҙҙе вағыраҡ, әммә көнкүрештә бик тә кәрәкле бүләктәр менән дәртләндерәйек тибеҙ. “Аҙна бүләге” акцияһын 1 ноябрҙән башлайбыҙ, шуға күрә квитанцияларығыҙ күсермәһен көтөп ҡалабыҙ: [email protected] электрон почта адресына йәки WhatsApp ҡушымтаһы аша 8-989-954-78-38 номерына. Районда почта хеҙмәткәрҙәре лә ауылдаштарын был эштә әүҙемләштерер тип ышанабыҙ. Ололарға квитанция күсермәһен ебәреүҙә, бәлки, ярҙам да кәрәк булыр. Гәзиткә яҙылып, квитанцияларын һалған барыһы ла аҙаҡ ҙур бүләк отошта ла ҡатнашасаҡ.

Башҡорт баҫмаларын бергәләп күтәрәйек, үҙебеҙҙең гәзит-журналдарға яҙылайыҡ, уҡыйыҡ!