Еләк отторҙоҡ, сиратта –триммер!

Әлбиттә, гәзиткә бүләк өсөн яҙылмайһың, шулай ҙа уйын ҡомары үҙенекен итә – бәлки, тап миңә уңыш йылмайыр, тигән уйҙан ауыҙ үҙенән үҙе йырыла, кәйеф күтәрелеп китә. 17 июлдә был күңелле сараны үткәреп ҡуясаҡбыҙ. Ишембай ойоҡ фабрикаһынан башҡортса яҙыулы ҡупшы нәскиҙәр, эшҡыуар Айгөл Ваһапованың “Мясные радости” магазинынан итле ярымфабрикаттар, Маҡар урман хужалығынан боланут сәйе, торттар батшабикәһе Люциә Бәшированан еңеүсе теләгән көнгә ҡупшы торт һәм тағы күп төрлө бүләктәр хәстәрләнек. Ә иң төп бүләк нимә тиһегеҙме? Салғы, ай әттәгенәһе, триммер! Бензинлы триммер! Геүелдәтеп ихата тирәһен ялт иттереп йөрөгәндә кемегеҙ шәп бүләк өсөн “Торатау” гәзитенә рәхмәт юллар икән? Беҙгә лә ҡыҙыҡ әй!

Июнь айы тамамланғансы гәзиткә яҙылып, тиҙ генә квитанция фотоһын 8- 989- 954- 78-38 телефон номеры буйынса ватсапҡа йәки
редакцияның электрон почтаһына юллай һалығыҙ - [email protected].

Ә ошо көндәрҙә Маҡар ураман хужалығы “Торатау” редакцияһы менән берлектә вәғәҙәләгән бер биҙрә еләген оттороп ҡуйҙы. “Бәйләнештә” селтәрендә “Көнъяҡ Уралдан боланут сәйе” (“Иванчай Ишимбай” https://vk.com/ivanteabash) төркөмөндәге уйын шарттары буйынса, “Торатау” гәзитенә 9-17 июндә яҙылырға һәм гәзиттең дә, редакцияның да төркөмөндә торорға кәрәк ине. Һөҙөмтәлә еләк Зөлфиә Сәғиҙуллинаға яҙған булып сыҡты. Кисә ҡыҙы Алина, улы Динар менән редакцияға килеп, рәхмәттәр әйтеп, кистән йыйып ҡуйылған бүләкте алып ҡайтып киттеләр. Шуҡ Динар уны юлда уҡ ашап бөтөргә самалай ине.

- Балаларҙың ныҡ еләкле булғыһы килде, көн дә “Отош ҡасан? Отһаҡ ярар ине!” тип кенә торҙолар. Шуға еңгәнбеҙҙер ҙә тим. “Торатау” гәзитенә элекэлектән яҙылабыҙ. 90 йәшлек инәйем, тыл ветераны Миңлеямал Зыя ҡыҙы Абдрахманованы ҡарайым, бергә йәшәйбеҙ. Иң тәүҙә гәзитте ул уҡый. Атай-әсәй мәрхүм булғандан һуң тыуған ауылыбыҙ Алмалы менән бәйләнеш өҙөлгән тиерлек. Ә район гәзите шул юҡһыныуҙы бер аҙ баҫа, район күләмендә хәлваҡиғаларҙы белеп, яҡташтар тормошон күҙаллап торабыҙ. Баҡсаһыҙ кешене тик торғандан еләкле иттегеҙ, ҙур рәхмәт! - тине Зөлфиә күңеле булып. Үҙегеҙгә рәхмәт, тоғро гәзит уҡыусылар менән бәйләнеш бер ҡасан да өҙөлмәһен!