Ибраһим ағайҙы ҙурланыҡ

Күренекле башҡорт яҙыусыһы Ибраһим Ғиззәтуллиндың тыуыуына 100 йыл тулыу айҡанлы Үҙәкләштерелгән китапхана системаһы менән берлектә ойошторолған викторинала тиҫтәнән ашыу кеше ҡатнашты. Ошо көндәрҙә редакцияла еңеүселәрҙе йыйып тәбрикләнек.

- Арағыҙҙа күп йылдар “Торатау” гәзите менән хеҙмәттәшлек иткән оло апайҙар, ағайҙарҙы күреү шатлыҡлы. Әммә тыуған яғыбыҙға, күренекле шәхестәргә бәйле ошондай конкурстарҙа йәштәрҙе күберәк күрге килә, - тип мөрәжәғәт итте “Торатау” гәзите мөхәррире Гөлнур Дәүләтйәрова ҡунаҡтарға. - Викторинаны район уҡыусылары күтәреп алыр тигән өмөт аҡланманы. Киләсәктә башҡорт теле һәм әҙәбиәте уҡытыусылары ла бындай сараларҙың маҡсатын дөрөҫ аңлап, уртаҡ эш итеп күреп, әүҙем ҡатнашыр, балаларҙы дәртләндерә белер, тип ышанабыҙ.

Сараны ойоштороп ебәреп, викторина һорауҙарын төҙөүсе Минзәлә Мырҙабаева, Әрмет ҡыҙы – Ибраһим ағайҙың ауылдашы булараҡ та, барлыҡ ҡатнашыусыларға оло рәхмәтен белдерҙе. Әйткәндәй, еңеүселәр араһында ла әрметтәр булыуына ҡыуандыҡ – оҙаҡ йылдар мәҙәниәт өлкәһендә тырышҡан Йәмилә Ғөбәйҙуллина, ғүмерен балаларға арнаған башҡорт теле уҡытыусыһы Наилә Байбулдина яугир әҙип хаҡында бала саҡ иҫтәлектәре менән уртаҡлашты.

Сәй табыны артында дауам иткән аралашыуҙа оло быуын гәзиттең йөкмәткеһенә ҡағылышлы теләк-тәҡдимдәрен әйтте. Артабан да хеҙмәттәшлек, таяныс тойорға булһын уҡыусыларыбыҙҙа.