Дарыуҙан яҡшыраҡ дауалай...

Күҙҙәрҙе әсеттерә, илата торған йәшелсә көкөрткә бай, шунлыҡтан уға бактерияларға, сеп­сисҡа ҡаршы тороу үҙен­сәлектәре хас, тип иҫбат­лай ул: “Танауҙы таҙартыу өсөн бик яҡшы сара ул. Башығыҙҙы артҡа ташлап, танау өҫтөнә бер-ике һу­ған киҫәге һалып еҫкә­геҙ. Уны тураҡлап, тәрилкәгә һалғандан һуң, башты таҫтамал менән ябып та, йәшелсәне еҫкәр­гә мөм­кин. Эйе, процедура кинә­нес тыуҙырмай, әммә ул танау эсен яҡшы таҙарта.

Йүтәлдән ҡотолоуҙың бер юлы – һуған сиробы. Бер баш һуған, ярты баш һарымһаҡ, яртышар шәшке көрән һәм аҡ шәкәр ҡомон блендерҙа болғатып, бал өҫтәгеҙ. Һауытты ҡапҡас менән ябып, 8-12 сәғәткә һыуыт­ҡысҡа ул­тыр­тығыҙ. Аҙаҡ берәр ҡалаҡлап эсегеҙ. Тәме оҡшамаҫ, әммә йонсотҡос йүтәлдән ҡото­лорһоғоҙ.

Һуғанды уҡшытҡанды баҫыу, насар еҫтәрҙән ҡотолоу өсөн дә ҡулла­налар. Уның зарарлы   бәшмәксәләргә ҡаршы тороу үҙенсәлеге бар. Эш­тән ҡайтҡандан һуң  си­сен­гәндә аяҡтарҙан насар еҫ килгәнен тойһағыҙ, табандарҙы һуған менән ун минут тирәһе ышҡы­ғыҙ, аҙаҡ йылы һыу менән йыуығыҙ. Ике-өс көн ошолай эшләһәгеҙ, насар еҫтән ҡотолорһоғоҙ.

Йәйен серәкәй тәнде тешләп йонсота, тире ҡысытыуына түҙеп булмай. Был саҡта ла ярҙам­ға һуған килә. Ҡысытҡан тирегә  һуғанды һалып торһағыҙ, ҡысытыу ҡул менән һыпырып алғандай юҡҡа  сығыр. Сәс ныҡ ҡойолғанда һуған һуты ярҙам итә, сөнки унда, бая әйткәнемсә, көкөрт күп тупланған”.

Динә АРЫҪЛАНОВА 

Фото «Кандински» программаһы ярҙамында эшләнде.