Янғын һүндереүселәр халыҡҡа янғындан нисек ҡотолорға кәрәклеген аңлатты

Янғын һүндереү хеҙмәте хеҙмәткәрҙәре белдереүенсә, күптәр йылытыу өсөн ҡулдан эшләнгән йәки боҙолған йылытҡыстар ҡулланыуын дауам итә, электр селтәрҙәренә көсөргәнеште арттыра, бер нисә приборҙы бер розеткаға тоташтыра. Бындай осраҡтар йыш ҡына янғын сығыуға килтерә.

Ғәҙәттән тыш хәлдәр министрлығы хеҙмәткәрҙәре электр сымдарының һәм розеткаларҙың торошон даими тикшерергә, ҡабыҙылған приборҙарҙы ҡарауһыҙ ҡалдырмаҫҡа (айырыуса төндә) кәңәш итә. Хатта зарядҡа ҡуйылған телефон да, боҙолған осраҡта, янғын сығанағы булып тороуы мөмкин.

Мейес менән йылытыуға айырыуса иғтибар бүлергә кәрәк. Миҙгел башланыр алдынан төтөн юлын таҙартырға, ҡапҡастарҙың төҙөклөгөн тикшерергә һәм яндырыу өсөн еңел янып китә торған шыйыҡсаларҙы ҡулланмаҫҡа кәрәк.

Йыш ҡына янғындар тәмәке тартҡанда һаҡһыҙлыҡ арҡаһында килеп сыға. Белгестәр биналар эсендә тартыу ғәҙәтенән бөтөнләй баш тартырға кәңәш итә - һүндерелмәгән бер тәмәке бер нисә минут эсендә тотош йортто юҡ итә ала.

Әгәр ҙә янғын сыҡһа, шунда уҡ бинанан сығып, 01 йәки 112 телефонына шылтыратырға кәрәк. Иң мөһиме - ғүмерҙе һәм һаулыҡты һаҡлау, мөлкәтте тергеҙергә мөмкин.

Ишембай янғын һүндереүселәре иҫкәртә: йортоғоҙҙоң хәүефһеҙлеге иғтибарлылыҡҡа һәм яуаплылыҡҡа бәйле. Ябай ҡағиҙәләрҙе үтәгеҙ – шул саҡта йортоғоҙҙа һәр ваҡыт йылы һәм тыныс булыр.