Һарытау йырсыһы Башҡортостан полкына йыр бағышлаған

Йырсы үҙенең башҡорт милләтенән булыуын белдерҙе.

– МХО-ла ҡатнашыусыларға арналған йырҙарығыҙ интернет селтәрендә популярлыҡ яуланы. Һеҙ – һәүәҫкәр йырсы, яугирҙәр алдында ла сығыш яһайһығыҙмы?

– Минең өсөн яугирҙәребеҙгә терәк булыуҙы бик мөһим тип иҫәпләйем, сөнки 2021 йылдан үҙем дә контракт төҙөп, Росгвардияла хеҙмәт итәм. Махсус хәрби операция зонаһында ла, ҡала госпиталдәрендә лә сығыш яһайым. Әстрханда быйыл февраль айында Олег Газманов менән бер сәхнәлә сығыш яһаным, ә отпуск ваҡытында МХО-ла ҡатнашыусыларҙың ғаиләләре өсөн өс хәйриә концерты ойошторҙом.

– «Башҡортостан» мотоуҡсылар полкына йыр бағышлау уйы нисек тыуҙы?

– Атайым сығышы менән Һарытау өлкәһенең Ҡунаҡбай ауылынан, әсәйем – Первомайский (Дохлов) ҡасабаһынан, һуңынан ул да башҡорт ауылында йәшәгән. Башҡортостандан, Татарстандан ил һаҡларға юлланған егеттәребеҙ рухын күтәреү өсөн туған телемдә лә йырланым. Ә «Иван, Шамиль һәм Салауат» йырының һүҙҙәрен Белгород ҡалаһынан шағирә Елена Ключищева яҙҙы, уны уҡығас, был йыр тап шулай яҙылырға тейешлеген, баянға башҡорт көйҙәре ҡушырға кәрәклеген аңланым. Башҡорттарҙың батыр яугир икәнен беләм, милләтебеҙ менән ғорурланам. Ә хәҙерге ауыр ваҡытта окоптарҙа егеттәр, ниндәй генә милләттән, ниндәй генә ҡаланан булмаһын, бер туғандай берләшеп ил һағында тора.

– Социаль селтәрҙәрҙәге сәхифәләрегеҙҙең күбеһе блокҡа ҡуйылған, мәғлүмәт һуғышы һеҙгә лә ҡағылдымы?

– Ысынлап та, дошман барыһын да күреп тора һәм социаль селтәрҙәрҙәге аккаунттарымды юйырға тырыша. Нацистар был юҫыҡта ла көрәш алып бара. Артемовск (Бахмут) өсөн ҡаты алыштар барғанда Вагнер ЧВК-һына арнап йыр яҙғайным, күп сәхифәләр шул ваҡытта юйылды. Шуға ҡарамаҫтан, йырҙарым халыҡ ярҙамы менән билдәлелек яуланы. Ижадымды тыңлаған һәр кешегә рәхмәтлемен.

– Һеҙҙең исемегеҙ бик көслө, кем ҡушҡан уны һеҙгә?

– Был исемде атайым ҡушты, уға сикһеҙ рәхмәтлемен. Ҡыҙғанысҡа ҡаршы, ул быйыл арабыҙҙан китеп барҙы. Мин беләм, Салауат – ул мосолмандар өсөн бик мөһим доға, бөтә донъяға билдәле башҡорт милли батыры Салауат Юлаев – беҙҙең рухи маяғыбыҙ. Алғы һыҙыҡта Тыуған илен һаҡлаған һәр башҡорт егете Салауат батыр кеүек данланырға хоҡуҡлы, тип уйлайым.