Коронавирус сигенеүен дауам итә

Һуңғы айҙа коронавирус менән сирләү кимәле 83 процентҡа, ә уҙған аҙнала 42 процентҡа кәмегән. Был турала бөгөн Республикаға идара итеү үҙәгендә үткән Хөкүмәттең оператив кәңәшмәһендә һаулыҡ һаҡлау министры вазифаһын башҡарыусы Азат Рәхмәтуллин әйтте.

Әлеге ваҡытта республикала 285035 сирле теркәлгән, һуңғы тәүлектә – 151 осраҡ. 725 кеше – амбулатор, тағы 151-е стационарҙа дауалана. Башҡортостанда бындай сирлеләр өсөн 670 урын әҙерләнгән, уларҙың 33 проценты буш. Шулай уҡ һуңғы тәүлектә вирус эҙемтәләренән бер кеше вафат булған, вирус ҡорбандарының дөйөм һаны 5600 кешегә еткән. Ә бына һауыҡҡандар һаны бер тәүлектә - 140, йәмғеһе 263461 кеше.

– Вакцинацияның юғары кимәле Башҡортостанға ковидҡа бәйле хәүеф кимәле буйынса йәшел зонаға инеү мөмкинлеге бирә. Республиканың 47 районында прививкалар буйынса план 100 проценттан артҡан, 15 районда вакцинация проценты – 80-дән 90 процентҡа тиклем, Межгорьела 79 процент тәшкил итә, – тип билдәләне Азат Рәхмәтуллин.