Башҡортостанда һауа температураһының йәнә үҙгәреүе көтөлә

Башгидрометүҙәктән был аҙнаға һауа торошон хәбәр иттеләр. Синоптиктар фаразынса, республикала йәшәүселәрҙе һауа температураһының үҙгәреүе көтә. Шишәмбе, 16 ноябрҙә, Башҡортостанда яуым-төшөмһөҙ һалҡын һауа торошо һаҡлана. Төндә һауа температураһы -13, -18, аяҙытҡанда -23, көндөҙ -6, -11 градус була.

«Аҙна уртаһында атмосфера баҫымы түбәнәйә башлай, атмосфера зонаһы фронттарында ҡар, епшек ҡар яуа, урыны менән буран, боҙлауыҡ күренештәре, юлдарҙа ҡар һырынтылары. Һауа температураһы төндә -6, -11, көндөҙ +1, -4 градусҡаса күтәрелә. 18 ноябрҙә һауа торошоноң йәнә һалҡын булыуы көтөлә. Төндә -13, -18, урыны менән -20, -25, көндөҙ -5, -10 градус», - тип иҫкәртте метеорологтар.

Аҙна аҙағында һауа торошо йәнә боҙола, ҡар яуыуы, буран сығыуы ихтимал. Һауа температураһының күтәрелеүе көтөлә.

Башинформ

Илья Кузнецов фотоһы (https://vk.com/ishimbaiphoto)