+21 °С
Болотло
Новости
5 Февраль 2019, 23:00
Радий Хәбиров бизнесҡа хөрмәт менән ҡарарға тәҡдим итте
Башҡортостанда бизнес үҙен яҡшы тойорға тейеш, уға хөрмәт менән ҡарарға кәрәк. Башҡортостан Башлығы вазифаһын ваҡытлыса башҡарыусы Радий Хәбиров төбәк эшҡыуарҙары менән «Бизнес-клуб» форматында уҙғарылған осрашыуҙа ошо хаҡта белдерҙе.
Башҡортостанда бизнес үҙен яҡшы тойорға тейеш, уға хөрмәт менән ҡарарға кәрәк. Башҡортостан Башлығы вазифаһын ваҡытлыса башҡарыусы Радий Хәбиров төбәк эшҡыуарҙары менән «Бизнес-клуб» форматында уҙғарылған осрашыуҙа ошо хаҡта белдерҙе. Унда инжиниринг, девелопер компаниялары етәкселәре, программа тәьминәтен, пилотһыҙ осоу аппараттарын әҙерләүселәр, медиа-контент етештереүселәр ҡатнашты. Осрашыу башланыр алдынан Радий Хәбиров эшҡыуарҙар продукцияһы һәм хеҙмәттәре күргәҙмәһе менән танышты.
Бер нисә йыл дауамында республикала инвестиция әүҙемлеге кәмей, тип билдәләне Башҡортостан етәксеһе.
«Бының сәбәптәре күп, шул иҫәптән объектив шарттар. Ләкин, шуға ҡарамаҫтан, ҙур төбәктәрҙе – Мәскәү өлкәһен, Татарстанды, Свердловск, Силәбе өлкәләрен алһаҡ, коллегаларыбыҙҙың барыһы ла һәйбәт икәнен күрәбеҙ. Шуға күрә хәҙер бының өҫтөндә әүҙем эшләйбеҙ», — тине Радий Хәбиров.
Төбәк етәксеһе һүҙҙәренсә, тышҡы иҡтисади инвестиция йәлеп итеү ҡеүәһе менән бәйле динамика ла ҡыуандырмай.
«Минең фекеремсә, бында хәл бик мөшкөл, сөнки тышҡы сауҙа тауар әйләнеше һәм сит ил инвестициялары күләме күрһәткестәре беҙҙә 2008 йылдан бирле иң насары. Ун йыл эсендә алға китергә мөмкин ине, ә беҙ бер аҙ арттараҡ ҡалдыҡ».
Муниципалитеттар һәм ведомстволар етәкселәре иҡтисад, тотош социаль тормош эшҡыуарҙар ҡулында икәнен аңларға тейеш, тип иҫәпләй Радий Хәбиров.
«Әгәр унда һалымдар ҙа, бер нәмә лә булмаһа, ниндәй социаль тормош тураһында һүҙ алып барырға мөмкин? Беҙ, әлбиттә, атайҙарыбыҙ ойошторған ҙур предприятиеларҙы бик оҙаҡ файҙалана алабыҙ. Ләкин үҙебеҙгә лә нимәлер булдырырға кәрәк, бер йылда мөхитте үҙгәртербеҙ һәм халыҡ беҙгә ышаныр», — тип белдерҙе республика етәксеһе.
Әңгәмә барышында осрашыуҙа ҡатнашыусылар заманса IT-парк һәм балалар өсөн күңел асыу паркы ойоштороу, урындағы предприятиелар өсөн тендерҙар уҙғарыу шарттарына үҙгәрештәр индереү кәрәклеген билдәләне. Радий Хәбиров бер нисә башланғысты «Инвестиция сәғәте» барышында тикшерергә тәҡдим итте.
Фото: Олег Яровиков
