Еңеүҙе яҡынайтыусы һәр кем - Ватанды һаҡлаусы

Тантана Геройҙар аллеяһында Мәңгелек утҡа сәскә һалып, Бөйөк Ватан һуғышында һәм башҡа хәрби хәрәкәттәрҙә батырҙарса һәләк булған яугирҙарҙы иҫкә алыуҙан башланды.

Хәрбиҙәр көнөнә бағышланған сараның икенсе өлөшө мәҙәниәт һарайында дауам итте. Муниципаль район хакимиәте башлығы Азат Ишемғолов ҡунаҡтарҙы сәләмләп, махсус хәрби операцияла һәләк булған яугирҙарҙың яҡындарына Батырлыҡ ордены тапшырып үтте. Яҡташ батырҙарҙың исемдәре мәңгелек – Ишбулды Йосоп улы Зөлҡәрнәев, Камил Сәғиҙулла улы Исмәғилов, Айнур Фаяз улы Ибраһимов, Филүс Сабирйән улы Усманов...

- Айнур улым 8-се мәктәпте тамамлап, һөнәрселек колледжында уҡып сыҡты. Һөнәре буйынса иретеп йәбештерүсе ине. Ғаилә ҡороп, себерҙә вахта ысулы менән эшләп йөрөнө, - тине яугир әсәһе Зөлфиә Ибраһимова. – Махсус хәрби операцияға үҙ теләге менән барҙы. Уның батырлығы башҡаларға өлгө, ул ихтирамға лайыҡ кеше.
Был көндә шулай уҡ әүҙем гражданлыҡ позицияһы күрһәткән яҡташтар, ирекмәндәр рәхмәт хаттары менән билдәләнде.

Байрам концерты шуның менән иҫтәлекле булды, махсус хәрби операция яугирҙары Дамир Ниғмәтуллин һәм Рәмил Рәхмәтуллин Ватанды һаҡлаусыларға бағышланған йыр башҡарҙы.

Автор фотолары һәм видеолары.