“Һөт кухняһы”нда - тик сифатлы ризыҡ

Билдәле булыуынса, 2025 йыл Башҡортостанда махсус хәрби операцияла ҡатнашҡан яугирҙарға һәм уларҙың ғаиләләренә ярҙам итеү йылы, тип иғлан ителде. МХО ветерандары ғаиләләре “Һөт кухняһы”ның ризыҡтарын бушлай алыу мөмкинлегенә эйә. Был файҙаланыусыларҙың иҫәбен тағы ла 1,5 мең кешегә арттырасаҡ.

Тәбиғи йогурттар һәм тәмле эремсектәр

Ишембайҙа “Һөт кухняһы” Губкин урамы, 36 адресы буйынса урынлашҡан. Дүшәмбе һәм кесаҙна көндәрендә бында сифатлы һөт ризыҡтарын алырға мөмкин. Ул аҙ тәьмин ителгән һәм күп балалы, инвалид балалар тәрбиәләгән ғаиләләргә, шулай уҡ махсус хәрби операцияла ҡатнашыусыларҙың ғаиләләренә бушлай бирелә. Иртә таңдан һатыусылар тауарҙарҙы ҡабул итә, витриналарға ҡуя. Һуңынан, исемлектәрҙе тикшереп, бушлай һөт ризыҡтары алыуға хоҡуғы
булғандарға уларҙы тарата. Был хоҡуҡҡа ҡала һәм районда яҡынса 170 кеше эйә.

- Алыусылар исемлеге даими яңыртыла, - ти “Һөт кухняһы” хеҙмәткәре Наталья Ғәлимова. - Кемгәлер өс йәш тула, кемдер, киреһенсә, һөт ризыҡтарын алыу
өсөн документтарын рәсмиләштерә. Бала тыуғандан алып бер йәшкә тиклем айына бер тапҡыр – ҡоро ҡатнашма, биш айҙан ике йәшкә тиклем бутҡа бирелә. Бөгөн 13 сабыйға тыуғандан алып туҡландыра торған ҡатнашма бирелә. Алты айҙан аҙнаһына бер тапҡыр эремсек, һигеҙ айҙан бер йәшкә тиклем йогурт, һөт һәм эремсек бирелә. Өлкәнерәк балалар өсөн нормативтар ике-өс тапҡырға арта. Беҙҙең продукцияның барыһы ла тәбиғи, өҫтәмәләр юҡ. Һөт ике тапҡыр пастеризациялана. Производствола ҡоро һөт ҡулланылмай. Әсетелгән һөт ризыҡтары махсус әсеткеләр ярҙамында эшләнә. Йогурттарҙа джем ҡулланыла, буяуҙар һәм хуш еҫле матдәләр юҡ.

Балалар продукцияһын һаҡлау ваҡыты ҡыҫҡа, сөнки унда консерванттар юҡ. Мәҫәлән, һөттө етештерелгән ваҡытынан һуң өс тәүлек эсендә, йогурт һәм эремсекте биш тәүлектә ҡулланырға кәрәк.

- Мин бында тәмле һәм сифатлы һөт алырға киләм, уны йәш ярымлыҡ ҡыҙым бик яратып эсә, – ти күп балалы әсәй Екатерина Сафина. - Минең биш балам бар, улар бәләкәй саҡта эремсек һәм йогурт ярата торғайнылар. Хәҙер үҫтеләр инде, әммә ҡайһы ваҡыт “Һөт кухняһы”нан үҙҙәренә нимәлер һатып алыуҙы һорайҙар.

Заявка – электрон төрҙә

Бер нисә йыл элек кенә бушлай балалар аҙығын алыусылар иҫәбенә инеү өсөн собеста сиратта торорға һәм күп документтар йыйырға кәрәк була торғайны.
Бөгөнгө көндә ата-әсәләр электрон сервистарҙан бик теләп файҙалана, улар “Башҡортостандың дәүләт хеҙмәттәре” һәм “Минең документтарым” күп функциялы үҙәк порталдары аша дистанцион рәүештә заявка ебәрә ала. Заманса технологияларҙы индереү рәсмиләштереү ваҡытын ҡыҫҡартырға
һәм процесты контролдә тотоуҙы яҡшыртырға мөмкинлек бирә. Хәҙер ғариза биреү өсөн минималь ваҡыт талап ителә, сөнки мәғлүмәттәр шәхси кабинеттан автомат рәүештә тултырыла.

- Беҙгә ҡала һәм район халҡы «Һөт кухняһы» продукцияһын алыуға документтар әҙерләү өсөн мөрәжәғәт итә, - тип һөйләй күп функциялы үҙәктең Ишембай филиалы мөдире урынбаҫары Елизавета Сәғәҙиева. – Беҙ документтарҙы эшкәртеү процесын мөмкин тиклем ябайлаштырҙыҡ. Кешеләргә ғаризаларының статусын белер өсөн сиратта ултырырға кәрәкмәй – бындай мәғлүмәт шәхси кабинетта күренә. Ишембайҙа сифатлы һөт ризыҡтары бушлай бирелгән йәки һатып алырға мөмкин булған урын булыуы бик яҡшы. Минең бәләкәй балаларым юҡ, әммә ҡайһы ваҡыт ғаиләм өсөн унда ҡымыҙ һәм һөт һатып алам, улар беҙгә бик оҡшай.

Өлкәндәр өсөн һөт ризыҡтары

Дөрөҫөн әйткәндә, “Һөт кухняһы”нда булған тәүге минуттарҙа мине кәштәләрҙәге хаҡтар бер аҙ аптырашта ҡалдырҙы. Бында аҙыҡ-түлек бушлай бирелә, шуға ла улар булырға тейеш түгел, тип уйлағайным. Наталья Ғәлимова аңлатыуынса, продукция бик ҙур һорау менән ҡулланыла, шуға ла уны теләгән һәр кемгә һатыу өсөн сығарырға ҡарар итәләр.

Тәүге һатып алыусылар араһында балалары өс йәшкә еткән әсәйҙәр ҙә була. Улар файҙалы һәм тәмле продукциянан айырылырға теләмәй һәм магазинға барып, кефир, һөт, эремсек, йогурт һәм хатта ҡымыҙ һатып ала.

- Балалар өсөн һөт ризыҡтары – Стәрлетамаҡта, ә өлкәндәр өсөн Октябрьский ҡалаһында етештерелә. Белореттағы бүлексәлә ҡымыҙ эшләйҙәр,
- тип өҫтәй Наталья Ғәлимова. - Һөт эшкәртеү предприятиеларында “Һөт кухняһы” тауарҙарын етештереү өсөн махсус цехтар бар.

Дөйөм алғанда, дәүләт бурысын үтәүҙән тыш, бюджеттан тыш эшмәкәрлекте үҫтереүгә лә ҙур иғтибар бүленә.

Уҙған йылдың июненән “Һөт кухняһы” “өлкәндәр” продукцияһын да етештерә башлай. Октябрьскийҙа ғәмәлдәге производство бинаһы үҙгәртеп ҡорола һәм капиталь ремонтлана, заманса ҡорамалдар һатып алына һәм монтажлана, махсуслаштырылған һөт ташыусы машина һатып алына. Һөҙөмтәлә, цехтың ҡеүәте өс тапҡырға арта.

Өлкәндәр өсөн һөт ризыҡтары тулыһынса тәбиғи составы менән айырылып тора. Ул урындағы фермерҙарҙан алынған һөттән етештерелә, яһалма ингредиенттар ҡушылмай. Продукция майҙың масса өлөшө буйынса талаптарға яуап бирә һәм “Хәләл” сертификатына эйә.

Наградалары

2024 йылда “Һөт кухняһы”нан балалар эремсеге “Рәсәйҙең иң яҡшы 100 тауары” абруйлы конкурсы лауреаты исеменә лайыҡ була, ә майлылығы 3,2 процент менән пастеризацияланған һөт “Беҙҙең бренд” конкурсында Гран-при яулай. Тормош бер урында тормай, шуға күрә заманса стандарттарға һәм ҡулланыусылар көткән талаптарға тап килеү өсөн алдағы йылдарҙа ассортиментты киңәйтеү планлаштырыла.

ҺАНДАР КӨҘГӨҺӨНДӘ

2024 йылда Башҡортостанда 27904 кеше, шул иҫәптән 486 йөклө ҡатын-ҡыҙ, 621 бала имеҙгән әсәй, өс йәшкә тиклемге 25616 бала, 1181 махсус хәрби операцияла ҡатнашыусының ғаилә ағзаһы “Һөт кухняһы” продукцияһын бушлай алған.

Республикала һөт ризыҡтарын биреү һәм һатып алыу өсөн 132 пункт эшләй: улар – 63 фирма таратыу нөктәләре, һигеҙе - дәүләт аптекаһы нигеҙендә, 61 тораҡ пунктҡа күсмә алып барыла.

Уҙған йылда Башҡортостанда “Һөт кухняһы өсөн” продукция етештереү күләме 10,4 миллион порция самаһы һөт, йогурт һәм эремсек тәшкил итте. Ассортиментта 32 позиция иҫәпләнә.

Автор фотоһы.