Аллея яңыртыла

Ишембайҙың төп урамындағы был ҙур булмаған урын күптән инде ремонтҡа мохтаж ине. Аллея яңыраҡ яңыртылған Башҡортостан нефтен тәүләп асыусылар майҙанынан башлана. Заманса һәм уңайлы ҡала киңлеге ерлегендә Губкин урамынан Чкалов урамына тиклемге йәйәүлеләр зонаһы бик матур күренмәй.

Аллея “Тормош өсөн инфраструктура” милли проектының “Уңайлы ҡала мөхитен булдырыу” программаһы сиктәрендә иғтибар үҙәгенә әйләнә.

Программаның мотлаҡ шарты - урындағы халыҡтың тауыш биреүҙә һәм проектты тикшереүҙә әүҙем ҡатнашыуы. Ишембайҙар тағы ла бер уңайлы урын булдырыу менән ҡыҙыҡһыныуын иҫбатлай алды. Быйыл яҙ төҙөкләндереүгә әҙерлек эштәре башланды. Иң беренсе подряд ойошма иҫке һәм авария хәлендәге ағастарҙы ҡырҡыу менән шөғөлләнде, уларҙы тамырынан йолҡоп ташланы. Был ҡала халҡы араһында бер аҙ борсолоу тыуҙырҙы. Подряд ойошма вәкиле әйтеүенсә, ишембайҙарға борсолорға сәбәп юҡ – аллеяны яңы үҫентеләр биҙәйәсәк.

Әлеге ваҡытта төҙөлөш ойошмаһы эшен дауам итә – йәйәүлеләр зонаһын булдырыу планлаштырыла, уның буйлап рәхәтләнеп йөрөргә һәм ағастар күләгәһендә ял итергә мөмкин буласаҡ. Киңлек төрлө йәштәге кешеләрҙең мәнфәғәттәренә яуап бирәсәк һәм уңайлы ғына түгел, хәүефһеҙ ҙә буласаҡ: аллеяла тәүлек әйләнәһенә видеокүҙәтеү камералары ҡуйыласаҡ. Подрядсы ойошма реконструкция эштәре 2025 йылдың 30 октябренә тиклем тамамланырға тейеш, тип вәғәҙә итә.

– Алдағы көндәрҙә плитка һалыуҙы тамамлайбыҙ, был эштәр 90 процентҡа башҡарылған, – тип һөйләне төҙөкләндереү барышы тураһында “СТК-ГРУПП” подряд ойошмаһы директоры урынбаҫары Александр Козлов. - Параллель рәүештә яҡтыртыу монтажын әҙерләйбеҙ, бөтә кәрәкле ҡорамалдар һатып алынған. Шунан һуң йәшелләндереүгә тотонасаҡбыҙ: иҫке тупраҡты алмаштырып, газон сәсәсәкбеҙ һәм ҙур ағастар ултыртасаҡбыҙ, башлыса йүкәләр.

2025 йылда “Уңайлы ҡала мөхитен булдырыу” федераль проекты сиктәрендә Башҡортостанда дөйөм суммаһы 1,2 миллиард һумлыҡ 94 йәмәғәт биләмәһен яңыртыу күҙаллана. Радий Хәбиров билдәләүенсә, республика халыҡты төҙөкләндереү объекттары өсөн тауыш биреүгә йәлеп итеү һаны буйынса лидерҙар иҫәбенә инә:

- Республикабыҙ был тауыш биреүҙә үҙен яҡшы күрһәтә. Халыҡ унда әүҙем ҡатнаша һәм был бик мөһим, сөнки тораҡ пункттарҙа ниндәй йәмәғәт урындары булырға тейешлеген уларҙан да яҡшыраҡ белгән кеше юҡ. Беҙ парктарҙа, скверҙарҙа, башҡа территорияларҙа башҡарылған бөтә нәмәне халыҡ өсөн эшләйбеҙ, һәм уларҙың фекерен иҫәпкә алырға кәрәк.

Шуны ла билдәләп үтергә кәрәк, Ишембай районы уҙған йыл һөҙөмтәләре буйынса төҙөкләндереү объекттары өсөн тауыш биреүҙә республика буйынса тәүге унау иҫәбенә инде.

Елена АЛЕКСЕЕВА.

Автор фотоһы.