Рәхмәт һеҙгә, янғын һүндереүселәр!

Этҡол ауылының ирекле янғын һағы һәм Һайран ауылының янғын-ҡотҡарыу часы хеҙмәткәрҙәре менән осрашыуға Этҡол мәктәбе уҡыусылары саҡырылды. Ауыл биләмәһе хакимиәте башлығы Илгизәр Ихсанов сарала ҡатнашыусыларҙы сәләмләп, янғын һүндереүселәргә еңел булмаған һәм яуаплы хеҙмәттәрендә уңыштар теләне. Шулай уҡ Илгизәр Плюр улы 7-се класс уҡыусыһы Данил Булатовҡа Рәхмәт хаты тапшырҙы. Данил иғтибарлы булып, күрше йортта сыҡҡан янғынды иң беренсе күреп ҡала һәм янғын һүндереүселәргә хәбәр итә. Тап уның ярҙамы менән янғын тиҙ арала һүндерелә. 

Янғын һүндереүселәр уҡыусылар менән аралашып, янғын сығыуҙың төп сәбәптәрен атаны, ниндәй әйберҙәргә ут тиҙ тоҡаныуын аңлатты, янғын һүндереү ҡорамалдарын ҡулланырға өйрәтте. Осрашыу һуңында балалар тышта торған янғын һүндереү техникаһы менән яҡындан танышты. Шулай итеп уҡыусылар янғын хәүефһеҙлеге тураһында белемдәрен дә байытты, ысын геройҙар менән дә танышты.  

Фото: https://vk.com/id353426037