Иманы ныҡтың - милләте ныҡ

Кинйәбулат ауылының «Фәтиха» мәсете районыбыҙҙың иң матур, нур сәсеп ултырған иман йорттарының береһе. Күпселек йәш парҙар бында никах тантанаһын үткәрергә, яңы тыуған сабыйға исем ҡуштырырға килә. Ә өлкәндәр иһә дини белемдәрен байытыу өсөн Кинйәбулат мәсетенә уҡырға йөрөй.

Быйыл да изге Рамаҙан айында мәсеттән халыҡ өҙөлмәне. Көн аша бында ифтар мәжлестәре ойошторолоп, 70-90-лап кеше йыйылды. Йәмәғәткә ифтар ҡылдырыу өсөн үҙ өлөшөн индерергә теләүселәр ҙә байтаҡ ауылда. Ә инде йылдан-йыл йәш ғаиләләрҙең, балаларҙың мәсеткә күпләп килеүе бигерәк тә ҡыуаныслы күренеш. Ҡыҙҙар-малайҙар бәләкәйҙән үк атай-әсәйҙәренән, өләсәй-олатайҙарынан өлгө алып, тәүге намаҙҙарын ҡылып, аяттар тыңлап, иманлы булып үҫә. Баштарына яулыҡ бәйләп, түбәтәй кейеп, бәләкәй генә устары менән «Амин» тотоуҙарын күргәс, нисек һөйөнмәйһең дә, һоҡланмайһың, ти!

Мәсеттең имам-хатибы Рифат хәҙрәт Ғәйнетдиновтың вәғәздәрен ололар ҙа, балалар ҙа һәр саҡ ихлас тыңлай. Илебеҙ, ауылдаштар именлегенә, иман, бәрәкәт һәм тыныслыҡ булһын, тип, махсус хәрби операцияла хеҙмәт итеүсе яугирҙарыбыҙҙың тиҙерәк иҫән-һау әйләнеп ҡайтыуҙарын теләп аят-доғалар бағышлай ул.

Ҡатын-ҡыҙҙар иһә Сәғирә абыстай етәкселегендә мул итеп табын әҙерләй. Ураҙа тотоусылар итле аштан ауыҙ итеп, ҡоймаҡ, бәлештәр менән сәйҙәр эсеп, бер-береһе менән ихлас аралашып таралыша.

Ай буйы тотҡан ураҙа ғәмәлдәребеҙ ҡабул ителһен, ҡылған изгелектәребеҙ үҙебеҙгә, яҡындарыбыҙға яҡшылыҡтар булып әйләнеп ҡайтһын!

Автор фотолары.