Яратҡан йырсыһы менән осрашты

Тимур тыумыштан ДЦП диагнозы менән ауырый. Бәләкәйҙән егет йырсының бөтә йырҙарын яттан белә. Һаулыҡ мөмкинлеге сикле булһа ла, Тимурҙың күңеле шундай матур, киң. Йыр-моңға бәләкәйҙән ғашиҡ ул.

- Бала саҡтан ул Рөстәм Ғиззәтуллиндың йырҙарын тыңлап үҫте. Иртән торғас та магнитофонды ҡабыҙыуыбыҙҙы һорай ине. Элегерәк бүлмәһе уның плакаттар менән тулғайны. Башта кассеталарын, һуңынан дискыларын алып бирҙек. Хәҙер интернет заманы булғас, һәр яңы сыҡҡан йырын тыңлап, клиптарын ҡарап һөйөнөп ултыра улым. Тимурҙы ололап, хәлен белешеп, бүләктәрен тотоп килеп ололағаны өсөн Рөстәм Хәниф улына һәм уның командаһына ҙур рәхмәтлебеҙ, - ти Тимурҙың әсәһе Гөлсирә апай ҡыуанысы менән уртаҡлашып.

Тимур Рөстәм Ғиззәтуллин менән 2017 йылдан алып дуҫтар. Ишембайҙа шундай шәп тамашасыһы йәшәүен белеп ҡалыу менән йырсы уға үҙе килеп танышҡан. Хатта егеттең тыуған көнөндә булып, йырлап, сюрприз эшләп шатландырған.

- Быйыл миңә 50 йәш тулыу уңайынан ҙур программабыҙ менән республика райондары һәм күрше өлкәләр буйлап гастролдәргә сыҡтыҡ. Бөгөн Ишембайҙа һуңғы концертыбыҙ. Һеҙҙең яҡтарҙа булыу менән Тимур менән күрешеү изге бер йолаға әйләнеп китте. Был ғаилә беҙҙе һәр саҡ яҡты йөҙ һәм йылы аштары менән ихлас ҡаршы ала. Бөтә йырҙарымды белһә лә, Тимур аҙ мобилле булғанға күрә бер ҡасан да концертымда булмаған икән. Шуны белеп ҡалып, Тимурға һәм ата-әсәһенә иң алғы рәткә билеттар һәм бөтә йырҙарым индерелгән флешка бүләк итергә булдым. Ул тормошта ысын көрәшсе. Уны мин күптәргә өлгө итеп ҡуйыр инем. Артабан да шулай бер ниндәй ҙә ауырлыҡтарға ҡарамай, тик алға ҡарап, йырлап йәшә, Тимур, - тине йырсы.

Автор фотолары.