Медицина хеҙмәткәрҙәре өсөн уңайлы шарттар

Учреждениены асыу сараһында абруйлы ҡунаҡтар һәм урындағы халыҡ әүҙем ҡатнашты. Ҡыҙыл таҫманы алҡышлауҙар аҫтында Башҡортостан Республикаһы Һаулыҡ һаҡлау министрының беренсе урынбаҫары Роберт Иштуков һәм муниципаль районы хакимиәте башлығы Азат Ишемғолов киҫте.

- Объект “Һаулыҡ һаҡлау” милли проектың “Һаулыҡ һаҡлау звеноһының беренсел модернизацияһы” программаһы сиктәрендә эшләнде, - тине Роберт Иштуков. – 2024 йылда ошо проект сиктәрендә ете һаулыҡ һаҡлау ойошмаһын төҙөү, туғыҙ медицина ойошмаһын капиталь ремонтлау, 135 тиҙ йүнәлештәге конструкциялар ҡуйыу планлаштырған (уларҙың 93-ө әлеге мәлгә төҙөлгән). Медицина ярҙамы буйынса эштәр ҙә яйға һалынасаҡ.

- Районыбыҙ өсөн был бик мөһим дата, - тип билдәләп үтте Азат Ишемғолов. – Үрге Этҡол ауылында 700-гә яҡын кеше йәшәй, амбулатория күрше ауылдарҙы ла хеҙмәтләндерәсәк, ә был ике мең кеше тигән һүҙ. Улар барыһы ла сифатлы ярҙам аласаҡ. 2024 йылда шулай уҡ Ҡолғона һәм Маҡар ауылдарында табип амбулаториялары асыласаҡ.

Ауыл кешеләре тәүгеләрҙән булып амбулатория тупһаһы аша үттеләр. Яңы медицина учреждениеһында процедура, ЭКГ кабинеттары бик уңайлы урынлашҡан. Иң мөһиме, хәҙер ауылда стоматолог эшләйәсәк, уның кабинеты кәрәкле ҡорамалдар менән йыһазландырылған. Йәш пациенттар төп халыҡ ағымы менән осрашмаясаҡ, педиатрға инеү урыны – икенсе яҡтан. Ә киҫкен респираторлы ауырыуҙар махсус боксҡа мөрәжәғәт итергә тейеш, был аҙым халыҡты сирҙән һаҡларға ярҙам итәсәк.

- Үҙ ауылым һәм амбулатория хеҙмәткәрҙәре өсөн бик шатмын, - тине Үрге Этҡол ауылында йәшәүсе Хәбирә Рәхмәтуллина. – Беҙҙә бик оҫта табип, фельдшерҙар һәм шәфҡәт туташтары. Хәҙер бында эшләү өсөн бөтә шарттар булдырылды. Элекке бина һыуыҡ, уңайһыҙ ине.

Ауылдаштар элекке осорҙо ла иҫкә алды. Рәйлә Иманғолова һәм Рәзинә Ғарифуллина иҫке амбулаторияла 30 йылдан ашыу эшләгән. Рәйлә Ғайфа ҡыҙы акушер булһа, Рәзинә Тимерйән ҡыҙы патронаж медицина хеҙмәткәре вазифаһында хеҙмәт иткән. Элегерәк стационар өсөн баҡса үҫтерергә, Һәләүектән һыу ташырға, утын әҙерләргә тура килә ине, тип иҫкә төшөрә улар. Бөгөнгө көндә медицина хеҙмәткәрҙәре пациенттарҙы уңайлы шарттарҙа ҡабул итә, көнүҙәк проблемалар тураһында хәүефләнмәй.

- Әлбиттә, шарттарҙы сағыштырырлыҡ түгел, - ти Рәйлә Иманғолова. – Беҙ шприцтарҙы, энәләрҙе ҡайната инек. Мейес яҡтыҡ, һыу йылыттыҡ. Бинала һыуыҡ ине! Ә хәҙер бында яҡты һәм йылы. Мин хеҙмәттәштәрем өсөн бик шатланам.

- Участкала балалар күп була торғайны, - тип иҫләне Рәзинә Ғарифуллина. – Кескәйҙәр өсөн айырым инеү урыны булыуы бик ҡыуаныслы, беҙ уларҙы һәр саҡ инфекциянан һаҡланыҡ. Бөгөн амбулаторияла участка табибы, фельдшерҙар һәм шәфҡәт туташтары эшләй.

Медицина хеҙмәткәрҙәре ауылдаштарҙы яңылыҡтар менән таныштырҙы һәм шунда уҡ үҙ хеҙмәтенә тотондо. Тәүге эш көнө сәғәтендә үк уколдар эшләнеләр, ҡан баҫымын үлсәнеләр, балаларҙы ҡаранылар.

- Амбулатория беренсел махсус һәм профилактик ярҙам күрһәтеү өсөн тулыһынса әҙер, - тип билдәләне участка табибы Лилиә Хәйруллина. – Бик яҡшы штат тупланды, яңы ҡорамалдар, йыһазландырылған кабинеттар бар. Беҙ ауылдаштар һаулығын ҡайғыртып эшләйбеҙ. Уларҙы көтөп ҡалабыҙ.

Автор фотолары.