Дауалау сифатлы һәм уңайлы булһын

Любовь Емаева медицина өлкәһендә 41 йыл хеҙмәт итә, шуларҙың 27 йылын - операция бүлмәһендә, 14 йылын Ишембай үҙәк район дауаханаһының эндоскопия бүлегендә эшләй. Уның бурыстарына пациенттарҙы яҙыу, уларға мәғлүмәт биреү, ҡорамалдарҙы, инструменттарҙы дезинфекциялау һәм процедуралар ваҡытында табипҡа ярҙам итеү инә.

Любовь Емаева әйтеүенсә, һуңғы йылдарҙа эшләүе еңелерәк - бөгөн заманса ҡорамалдар ҡулланыла, ә процедураларҙа файҙаланылған күп кенә инструменттар бер тапҡыр ҡулланыла торғандарға алмаштырылған.

Былтыр декабрь айында бүлеккә ике яңы фиброгастроскоп алынған. Был приборҙар ярҙамында көнөнә 10-15 кеше тикшереү үтә. Ҡайһы берҙә процедура ваҡытында табиптар пациент үҙе лә белмәгән ауырыуҙарҙы таба. Тәүге стадияла уларҙы операцияһыҙ дарыуҙар менән дауаларға мөмкин. Тимәк, был ҡорамалдар дауалау өсөн генә түгел, ә етди ауырыуҙарҙы иҫкәртеү өсөн дә тәғәйенләнгән.

Башҡортостан Башлығы Радий Хәбиров билдәләүенсә, медицина учреждениеларының ныҡлы матди-техник базаһы — һаулыҡ һаҡлау системаһы нигеҙҙәренең береһе. 2023 йылда был өлкәгә бөтә финанслау сығанаҡтарынан 106,9 миллиард һум аҡса йүнәлтелгән.

“Һаулыҡ һаҡлау” милли проекты сиктәрендә медицина ярҙамы инфраструктураһы үҫешә. Былтыр төбәк властары Башҡортостан биләмәһендә 98 тиҙ төҙөлә торған модуль конструкция, шул иҫәптән 84 фельдшер-акушерлыҡ пункты, туғыҙ табип амбулаторияһы, дөйөм практика табибының биш офисын һатып алды һәм урынлаштырҙы.

Шулай уҡ бер табип амбулаторияһына капиталь ремонт үткәрелде, дөйөм суммаһы 1,3 миллиард һумлыҡ 4 233 берәмек медицина ҡорамалдары һәм 203 миллион һумдан ашыу суммаға 185 автомобиль һатып алынды. Былтыр республикаға 25 күсмә медицина комплексы һәм 20 берәмек “ауыр” ҡорамал килтерелде.

Бынан тыш, дауаханаға паллиатив ауырыуҙарҙы алып барыу, табиптарҙың пациенттарға өйҙәренә йөрөү, биологик материалдарҙы тикшереүгә ташыу өсөн һигеҙ еңел автомобиль бирелде.

Республикала профилактик медицинаға ҙур иғтибар бүленә. “Ауырыуҙы дауалауға ҡарағанда иҫкәртеү еңелерәк”, – был һүҙҙәр һәр ваҡыт актуаль. 2022 йылда Башҡортостанда 1,5 миллион өлкән кеше һәм 850 меңгә яҡын бала диспансеризация һәм профилактик медицина тикшереүе үткән. Күсмә һаулыҡ үҙәктәре Башҡортостандың барлыҡ муниципаль райондарында 150 мең кешене үҙ эсенә алған 312 тораҡ пунктта булған. Шулай уҡ төрлө иҫкәртеү акциялары үткәрелә, улар араһында “Халыҡ һаулығы көндәре”, “Тормошҡа 10 000 аҙым” һәм башҡалар бар.

Ишембай районында 20 675 кеше - диспансеризация, 5499 кеше медицина тикшереүе үткән.

Алыҫ тораҡ пункттарҙа йәшәүселәрҙең һаулығы - республика властарының иғтибар үҙәгендә торған тағы бер тема.

Ринат Ғәйнетдинов һүҙҙәренсә, “Һаулыҡ һаҡлау” милли проектының “Беренсел звеноны яңыртыу” төбәк программаһы сиктәрендә Ишембай үҙәк район дауаханаһы мобиль күсмә флюорограф алған. Был алыҫ ауылдарҙа йәшәүселәргә рентгенологик тикшереү үткәреү мөмкинлеген биргән. Ошо осорҙа 18 тапҡыр ауылдарға сығып 1714 тикшеренеү үткәрелгән. Һуңғы өс йылда Ҡанаҡай, Әрметрәхим, Әхмәр ауылдарында - фельдшер-акушерлыҡ пункттары, Үрге Этҡолда, Маҡарҙа һәм Ҡолғонала табип амбулаториялары төҙөлгән.

Радий Хәбиров кадрҙар сәйәсәтенең учреждениеларҙы матди-техник яҡтан йыһазландырыуҙан кәм булмаған мөһим фактор, тип иҫәпләй. Республикала табиптарҙы йәлеп итеү өсөн “Ауыл табибы” һәм “Ауыл фельдшеры” кеүек программалар эшләй. Был һөнәрҙәр 300-гә яҡын хеҙмәткәргә былтыр компенсация түләүҙәрен алыу мөмкинлеген бирҙе.

Ишембай районында һуңғы өс йылда һигеҙ хеҙмәткәр “Ауыл фельдшеры” программаһында ҡатнашты һәм Бәрҙәшле, Яр-Бишҡаҙаҡ, Сәлих, Урман-Бишҡаҙаҡ, Аҙнай, Яңы Георгиевка, Ҡанаҡай һәм Восток ауылдарындағы фельдшер-акушерлыҡ пункттарында эшләй башланы. “Ауыл табибы” программаһы буйынса ике терапевт Петровск участка дауаханаһына һәм Үрге Этҡол табип амбулаторияһына эшкә килде.

Кадрҙарҙы яңыртыу мәсьәләһе лә мөһим.

Ишембай районы муниципаль районында әлеге көндә 173 табип һәм 557 урта звено медицина хеҙмәткәре эшләй.

 

Автор һәм Ишембай үҙәк район дауаханаһы архивы фотолары.