Яҡташтар өсөн ҡыуаныслы хәл

Әлеге мәлдә Ишембайҙа Башҡортостан нефтен тәүге асыусылар майҙанында реконструкция эштәре тулы көскә бара. Ремонт эштәре «Башнефть» предприятиеһының бюджеттан тыш аҡсаһы менән финанслана. Был реконструкция Башҡортостан нефтен асыуға 90 йыл тулыу уңайынан республика Башлығы Радий Хәбировтың башланғысы менән ғәмәлгә индерелгәйне.

Муниципаль район хакимиәте башлығының төҙөлөш, торлаҡ-коммуналь хужалыҡ һәм инфраструктура үҫеше буйынса урынбаҫары Ринат Юлғотлин һөйләүенсә, ремонт эштәре өс этаптан тора. Уларҙың тәүгеһе 2022 йылда башланған, был осорҙа канализация һыу тәьминәте системаһы, яңы электр һәм видоекүҙәтеү селтәрҙәре эшләнгән.
Реконструкцияның икенсе этабы 2023 йылда башҡарылған: брусчатка түшәлгән, япмалар ҡуйыу өсөн фундамент эшләнгән, амфитеатр монтажланған. Шулай уҡ яҡтыртҡыстар бағаналарын ултыртыу һәм электрға тоташтырыу, һыу ағыу системаһын монтажлау, бордюрҙар ҡуйыу эштәре үткән.

Өсөнсө этап сиктәрендә, йәғни быйылғы йылда эштәр күберәк парктың үҙендә бара.

- Әлеге мәлдә брусчатка, бордюр һалыу эштәре бара, балалар майҙансығында бәләкәй архитектура фигураларын монтажлайбыҙ, шулай уҡ уны бетонлауға әҙерләйбеҙ. Бәүелсәктәр япмаһын көпләйбеҙ, терраса таҡтаһын монтажлайбыҙ һәм буяйбыҙ, - ти “СТК” подрядсы ойошмаһы директоры Руслан Саттаров. Ремонт эштәрен тамамлау 24 авгусҡа – Ҡала көнөнә көтәлә.

- Ишембайҙа Башҡортостан нефтен тәүге асыусылар майҙаны – ҡаланың йөрәге. Бында ғаиләләр өсөн байрамдар, концерттар ғына түгел, ә спорт ярыштары ла үткәрелә. Был майҙанда уйнап, ял итеп өс-дүрт быуын үҫкән, - ти райондың физик культура, спорт һәм туризм буйынса идаралығы етәксеһе Марат Зарипов. – Ремонт эштәре тиҙ үтә, төҙөкләндерелгән майҙан башҡа илдәрҙән, республикаларҙан килгән ҡунаҡтарға ла оҡшар, тип ышанам. Унан килеп, был майҙан балалар, үҫмерҙәр өсөн бик яҡшы урын, улар бында велосипедта, скейтбордта, самокаттарҙа йөрөп, саф һауала ваҡыт үткәрә ала.

Ҡалала йәшәүсе 1938 йылғы Тамара Романова ғүмер буйы ошо паркка яҡын йәшәгән.

- Мин йәш саҡта майҙанда һәйкәл һәм асфальт ҡына ине. Иҫләйем, 7 Ноябрь, 1 Май байрамдарына бында трибуналар була торғайны, улар тирәләй демонстрция үтә, - тип иҫкә ала ул. - Байрамдарҙа киске ун бергә тиклем йәштәр өсөн бейеүҙәр ойошторола. Нефтселәр һәм башҡа һөнәр эйәләре көндәренә арналған күргәҙмәләр ойошторола, стендтар ҡуйыла. Бер заман матур булып шыршылар үҫте, ҡышын боҙ ҡаласығы, тауҙар эшләнелде, эҫе сәй һатылды. Һуңғараҡ фонтан барлыҡҡа килде. Ә 2000 йылдарҙың башында һәйкәлгә өйләнешкән йәштәр килеп, сәскәләр һала башланы. Шулай итеп, күп ишембайҙарҙың тормошо ошо майҙанда күҙ алдында үтте. Ололар өсөн дә, йәштәр өсөн дә уңайлы шарттар тыуҙырылыуына бик шатмын. Бының өсөн Республика Башлығы Радий Хәбировҡа оло рәхмәтебеҙҙе еткерәбеҙ, - ти ул.

Автор фотолары.