Еңеү менән ҡайтырға яҙһын!

Саодат беҙҙеңсә Сәғәҙәт була инде – ғәрәп теленән «бәхет» тигәнде аңлата. Ҡатын сығышы менән дә икенсе төбәктән, әсәһе башҡорт. Ире менән беҙҙең яҡҡа 90-сы йылдарҙағы үҙгәртеп ҡороуҙарҙан һуң күсеп ҡайтҡан, биш бала тәрбиәләп үҫтерәләр. Саодаттың тормош иптәше – хәрби кеше, отставкалағы офицер. Һөнәре буйынса инженер-радиоэлектронсы, Вильнюс ҡалаһында юғары хәрби училищены тамамлаған.

Ир махсус хәрби операцияла «Еңеү» ҡушаматы аҫтында хеҙмәт итә – 2022 йылда мобилизацияға алынған. Уға тиклем Кавказдағы хәрби хәрәкәттәрҙә ҡатнашҡан була.

Әлеге мәлдә «Еңеү» махсус хәрби операцияла бәйләнеш өсөн яуаплы.

- Ирем хәрби кеше булғас, комиссариатта иҫәптә торҙо. Шуға ла беҙ был хәлдәргә әҙер инек. Нисек булһа ла биш бала атаһы, йәше лә бара, әлбиттә, уның өсөн борсолам, - ти ҡатын.

Саодаттың ғаиләһендә дүрт малай һәм бер ҡыҙ тәрбиәләнә. «Еңеү»ҙең беҙгә еңеү менән ҡайтыуын теләйек! Һис шикһеҙ шулай булыр!

Автор фотоһы.