Һеҙҙең менән ғорурланабыҙ

Ошо көндәрҙә ике яҡташ яугир менән таныштыҡ. Береһенең әсәһе тураһында мәҡәлә яҙған булып сыҡтыҡ – баҡһаң, һалдаттар, унда, махсус хәрби операция зонаһында, «Торатау», «Восход» гәзиттәрен ҙур ҡыҙыҡһыныу менән уҡыйҙар икән.

- Мин махсус хәрби операцияға мобилизация буйынса киттем. Вахта ысулы менән эшләп йөрөй инем. Беҙ, ишембайҙар, унда күмәк, - тип һүҙ башланы «Сәләм» ҡушаматлы яугир. – Яҡташтарҙан посылка, хаттар килә. Йылы кейемдәр өсөн айырым рәхмәт әйтергә теләйем. Аҙыҡ-түлек тә етерлек.

Яҡташ яугирҙарыбыҙ һөйләүенсә, улар өсөн бигерәк тә балаларҙың хаттары, рәсемдәре ҡәҙерле.

- 23 февралгә балалар баҡсаһынан ебәрелгән һүрәттәр әле һаман эленеп тора. Кисен, йоҡлар алдынан, мин хаттарҙы ҡатҡат уҡып сығам. Кескәйҙәрҙең һүҙҙәренән күңелгә рәхәт булып китә, - ти «Сом» ҡушаматлы яугир.

«Сом» тағы ла бер ҡыуанысы менән уртаҡлашты – ул өсөнсөгә атай булырға йыйына. Балаларының олоһона - 20, бәләкәсенә 9 йәш, балалар ҙа бәпәйҙең тыуыуын түҙемһеҙләнеп көтә.

- Ғаиләләребеҙгә яҡташтар ярҙам итеп тора. Муниципаль район хакимиәте уларҙы иғтибарһыҙ ҡалдырмай. Ҙур рәхмәт, - тип дауам итә һүҙен яугир. – Барығыҙҙы ла Республика көнө менән ихлас ҡотлайым. Мин һәр саҡ тыуған ил, ғаиләм өсөн янып йәшәнем. Бында, беҙҙең ерҙә, тәртипһеҙлек булыуын теләмәйем.

Автор фотолары.