Яҡташтар ярҙам итергә әҙер

Ошо көндәрҙә Иҫке Һәйет ауылы халҡы өлөшләтә мобилизация барышында РФ Ҡораллы Көстәренә саҡырылған Ишембай районы ир-егеттәренә ойоҡбаштар, оҙаҡ һаҡлана торған аҙыҡ-түлек, башҡа кәрәк-яраҡтар һәм аҡсалата ярҙам йыйыу ойошторҙо. - Махсус операцияла ҡатнашҡан яугирҙарға еңелдән түгел икәнлеген аңлайбыҙ. Артабан да шулай ярҙам күрһәтергә әҙербеҙ, - ти иҫке һәйеттәр.

- Беҙ, мәҙәниәт хеҙмәткәрҙәре, ауылдаштарыбыҙҙың һорауы буйынса һәр йорт буйлап йөрөп сыҡтыҡ. Бәйләнгән йылы ойоҡбаштар биреүселәр байтаҡ булды. Һәр береһе лә берҙәм уй-маҡсат менән был изге эшкә ҡушылып, үҙ өлөшөн индерҙе. Уларҙың изгелеге үҙҙәренә икеләтә әйләнеп ҡайтһын, донъялар тыныс булһын, - тигән теләктә Иҫке Һәйет клубы мөдире Фәнилә Хәмитова.

Әйберҙәрҙе Ҡолғона ауылынан Урал Садыҡов ошо көндәрҙә Пенза ҡалаһына барып, хәрби-уҡыу сборында ҡатнашыусы яҡташ егеттәргә, ә йыйылған аҡсаны үткән аҙнала Салауат Ямалов шулай уҡ Пензаға юлланып Ҡолғона ауыл биләмәһенән резервсы 8 егеткә тапшырған. Әйткәндәй, ауыл биләмәһенән әлеге көндә Фидәил Ғөбәйҙуллин, Рамазан Ҡонаҡбаев, Айнур Мөхәмәтйәнов, Артур һәм Артем Токбулатовтар, Динар Кинйәбаев, Рәмис Ғәлиев, Тимур Халиҡов хәрби-уҡыу әҙерлеген үтә.

Фото: https://vk.com/public200644112