Ауыл хәбәрҙәре

1979 йылдың 25 декабре көндө көндөҙгө сәғәт өстә совет ғәскәрҙәре Афған ере сиген үтеп керәләр.Был һуғыш беҙҙең илгә 15 меңгә яҡын ҡурғаш табут, 36 мең яралы, 312 хәбәрһеҙ юғалған һалдат рәүешендә әйләнеп ҡайта. Ошо һандар артында күпме күңел әрнеүе, күҙ йәше, һындырылған яҙмыштар, ғәзиз балаһын көтөп ала алмаған ата –әсәләр, һөйгән йәреңде мәңгелеккә юғалтыу ғазабы ята.

Этҡол ауыл Советынан да Афған һуғышында ҡатнашыусы егеттәребеҙ була. Ҡыҙғанысҡа ҡаршы, уларҙың өсәүһе – Аҙнай ауылынан Ишморат Ғиниәтуллин, Уразбай ауылынан Марат Әсәҙуллин, Рим Иблиәминов яу яланында мәңгегә ятып ҡала. Ә китапханалағы осрашыуҙа яу яланынан иҫән йөрөп ҡайтҡан, батыр йөрәкле, ҡурҡыуһыҙ ауылдаштарыбыҙ Наиль Сәйфуллин, Булат Мәхмүтов, Байғужа ауылынан Булат Баһауетдинов, Сәлих, Һайран ауылдарында тыуып – үҫкән Айрат Кәримов һәм Миниғаян Хөсәйенов ҡатнашты.

Афған ере! Ун йыл буйы был һүҙ беҙҙең йәндәргә тынғылыҡ бирмәне. Күпме ҡан-йәш түгелде, сәскәләй ғүмерҙәр өҙөлдө. Һынатманылар беҙҙең егеттәр. Уларҙың береһе лә ниндәй генә ҡыйын хәлгә ҡалһа ла кешелек сифаттарын юғалтманы, намыҫына хыянат итмәне. Утты-һыуҙы кисеп тыуған илгә ҡайтҡас та һынатмай әле улар!

Ҡот осҡос афатты үҙ күҙе менән күргән, уның эсендә ҡайнаған, ғүмерендә мылтыҡ та тотоп ҡарамаған килеш, ямғыр кеүек яуған ҡурғаш аҫтында иҫән ҡалырға, ҡулһыҙ-аяҡһыз ҡалған иптәштәренең өҙгөләнеүҙәрен ишетергә тура килгән яҡташтарыбыҙ иҫтәлектәре менән бик бүлешкеләре лә килмәне. Әммә ләкин уларҙың йөҙҙәренә ҡарап кисерештәрен аңлап була ине. “Афғанистан – хәтергә хоҡуҡлы” видеоһы аша Ишембай ҡалаһы һәм районынан афған һуғышында һәләк булыусы яҡташтарыбыҙ тураһында белдек. Күңел яраһы, әсә һағышы, афған һуғышы тураһында шиғыр – йырҙар ҙа яңғыраны. Был осрашыуҙа ҡатнашыусы ололар ҙа, балалар ҙа һуғыш уты бер ерҙә лә ҡабынмаһын, донъялар имен булһын тигән теләктә булғандыр. Сараның һуңында “Интернационалист - һуғышсыларға” һәйкәленә сәскәләр һалынды.

Изге еребеҙҙе илбаҫарҙарҙан һаҡлап ҡалған, уның именлеге өсөн ғүмерен дә ҡыҙғанмаған Бөйөк Ватан һуғышы ҡаһармандары, Афған, Чечен ерендә һәләк булған, армия сафтарында хеҙмәт иткәндә йәш ғүмерҙәре ваҡытһыҙ өҙөлгән Башҡортостан улдарының яҡты иҫтәлеге алдында баш эйәбеҙ! Уларҙың исеме, яҡты маяҡ булып, быуындарҙан-быуындарға күсһен! Ҡәберҙәргә, һәйкәлдәргә һуҡмаҡ өҙөлмәһен!