+21 °С
Облачно
Йәмғиәт
2 Февраля 2021, 09:52
Тарих һаҡлай инәйҙәребеҙ
Ошо көндәрҙә Кинйәбулат урта мәктәбенең 5-се класс уҡыусылары һәм мәктәп эргәһендәге интернат балалары Этҡол ауылында йәшәүсе тыл ветераны Рәхмәтуллина Йәмилә инәйгә ҡунаҡҡа барҙы. Был осрашыу Совет ғәскәрҙәренең Сталинградты фашистарҙан азат итеүенә 78 йыл тулыу уңайынан ойошторолдо.
2 февраль – Рәсәйҙең хәрби дан көнө
Ошо көндәрҙә Кинйәбулат урта мәктәбенең 5-се класс уҡыусылары һәм мәктәп эргәһендәге интернат балалары Этҡол ауылында йәшәүсе тыл ветераны Рәхмәтуллина Йәмилә инәйгә ҡунаҡҡа барҙы. Был осрашыу Совет ғәскәрҙәренең Сталинградты фашистарҙан азат итеүенә 78 йыл тулыу уңайынан ойошторолдо.
Тарих уҡытыусыһы Азамат Шайморат улы Бөйөк Ватан һуғышы тарихында Сталинград ҡалаһы өсөн иң ауыр, иң ҡыҙыу алыш барған осорҙо һөйләп үтте. Йәмилә инәй иһә ошо ҡаланы тергеҙешкән, Этҡол ауылының иң оло йәштәге тыл ветеранына 94 йәш. Ул башҡа тиҫтерҙәре кеүек 12 йәшенән үк колхоз эшенә йөрөй башлай. Бер ниндәй ауыр эштән ҡурҡмаған ҡыҙҙы 16 йәшендә һуғыштан ҙур зыян күргән емерек ҡалаларҙы төҙөргә ебәрәләр. Ул көн әле лә хәтерҙә, ти инәй.
- Стәрлетамаҡ станцияһына тиклем атайым оҙата барҙы, илай- илай киттем. Юлда емерек ауыл-ҡалаларҙы үттек, ҡарауы аяныс ине. Сталинградҡа барып еткәс өс ай яланда йәшәнек, рәхмәт совет һалдаттарына, улар беҙҙе һаҡлап йөрөттө. Аҙаҡ таҡтанан ятаҡ төҙөнөләр, иҙәне ер ине, шунда йәшәп эшләнек. Волга йылғаһынан һыу эсергә ҡушманылар, сөнки унда үлектәр күп ине. Бер соҡорҙан 3-4 ай һыу эсеп, сәй ҡайнатып, аш бешереп йөрөнөк, унан да бер немецтың кәүҙәһе килеп сыҡты. Ауыр йылдар үттек, һуғышты ла, аслыҡты ла татыныҡ. Беҙ күргәнде һеҙгә күрергә яҙмаһын, балалар! – быларҙы ишетеп, балалар оло быуынға яҙған һуғыш михнәттәрен нығыраҡ аңланы.
Тиф менән ауырығас, Йәмиләне тыуған ауылына ҡайтарып ебәрәләр. Терелеү менән Свердловск өлкәһенә эшкә ебәрәләр. Унда ла бик күп һөнәргә
өйрәнеп, намыҫлы эшләп, тыуған яҡтарына ҡайтырға насип була. Уңған, сабыр ҡыҙ Этҡол ауылына килен булып төшә. Тормош иптәше Абдулла Санғулла улы менән
алты балаға ғүмер биргәндәр.
өйрәнеп, намыҫлы эшләп, тыуған яҡтарына ҡайтырға насип була. Уңған, сабыр ҡыҙ Этҡол ауылына килен булып төшә. Тормош иптәше Абдулла Санғулла улы менән
алты балаға ғүмер биргәндәр.
Уҡыусылар инәйҙең һөйләгәндәрен иғтибар менән тыңлағандан һуң, төрлө һорауҙарын бирҙе. Йәш быуын өсөн был онотолмаҫ осрашыу булды.
- Балалар, тырышырға кәрәк, атай-әсәйегеҙҙе, уҡытыусыларығыҙҙы тыңлап, хөрмәт итеп үҫегеҙ. Донъялар тыныс булһын, - тип теләне Йәмилә инәй. Осрашыу ойошторғанға күңеле тулып, барыбыҙға рәхмәттәр уҡып ҡалды.
Ҡайтыр алдынан малайҙар ишек алдын, урам-тирәһен тырышып ҡарҙан таҙартты.
Йәмилә инәй менән тағы ла икенсе йылға осрашырға һүҙ ҡуйышып, иҫтәлеккә фотоға төшөп хушлаштыҡ.
Элиза ҒИНИӘТУЛЛИНА, Кинйәбулат мәктәбенең башҡорт теле һәм әҙәбиәте уҡытыусыһы.