Депутаттар госпиталгә ярҙам ойошторҙо

Бөгөн Ишембай районы муниципаль районының бишенсе саҡырылыш Советы депутаттары Пролетар урамы, 26-сы йорт адресы буйынса урынлашҡан ковид-госпиталгә (инфекциялы ауырыуҙар бүлексәһе) көнүҙәк кәрәкле әйберҙәр тапшырҙы.

- Әйберләтә ярҙам күрһәтеү ниәтен депутаттар корпусы берҙәм күтәреп сыҡты. Беҙ ковид-госпиталь етәкселеге менән бәйләнешкә сығып, эштәрендә иң кәрәкле әйберҙәр исемлеген билдәләнек. Унда тәү сиратта хужалыҡ тауарҙары, электр кәрәк-яраҡтары,йыуыу һәм дезинфекциялау саралары керҙе. Коллективҡа байрам алдынан еләк-емеш тә алдыҡ. Барыһы ла үҙебеҙҙең аҡсаға, - тип уртаҡлашты депутаттарҙың береһе, Волга буйы федераль округындағы Башҡорт кадет корпусы директоры Александр Медведев.

– Бөгөнгө ҡатмарлы шарттарҙа медицина хеҙмәткәрҙәре үҙҙәрен аямай эшләй. Был ҙур түҙемлелек һәм яуаплылыҡ талап итә. Уларҙың һөнәри оҫталыҡтары алдында баш эйәбеҙ. Артабан да ҡулған килгәнсә ярҙам ойоштороп торасаҡбыҙ.