"Саҡырылмаған ҡунаҡтар"ҙан нисек ҡотолорға?

* Ерән ҡырмыҫҡанан ҡотолоуҙың иң уңайлы, арзанлы ысулы – әфлисун һәм лимон ҡабығын ҡулланыу. Бының өсөн ҡабыҡтарҙы киптерергә, шунан һуң уларҙы шкаф эсенә, өҫтәлгә, ҡырмыҫҡалар күренгән иҙән мөйөштәренә ҡуйып сығырға кәрәк. Бөжәктәр цитрус еҫен яратмай. Шуға күрә бер ни тиклем ваҡыттан һуң улар фатирҙан ҡасасаҡ.

* Иң һөҙөмтәле ысулдарҙың береһе – бор кислотаһы менән ем. Эш шунда: ҡырмыҫҡа, ҡайғыртыусан әсә кеүек, оянан сыҡмайынса ғына йәшәгән "туғандары"на ла ризыҡ алып ҡайта. Шулай итеп, ағыулы емгә ҡыҙыҡҡан бөжәк, үҙе лә һиҙмәҫтән, бөтә "саф"ты юҡ итә. Ем әҙерләү өсөн бор кислотаһын балға, йә бешкән йомортҡа һарыһына ҡушалар ҙа ҡырмыҫҡа күренгән урындарға ҡуялар. Тик емде аҙна һайын ҡарап, барлап торорға кәрәк. Ни өсөн тигәндә, ул кипкәс, бөжәктәрҙе ҡыҙыҡһындырмай башлай. Ҡырмыҫҡалар юҡҡа сығып бөтмәгән икән, емде яңыртырға кәрәк.

Был ерәнгес бөжәккә ҡаршы көрәштә лә бор кислотаһын ҡулланыуҙан яҡшыһы юҡ. Һөҙөмтәле лә, кешегә, бесәй-маҙарға да зыянһыҙ. Унан килеп, әллә ҡайҙарҙан эҙләп йөрөргә лә кәрәкмәй: теләһә ҡайһы аптеканан һатып алырға мөмкин. Тараҡан һыулы урындарҙы яратҡанлыҡтан, иң элек йыуыныу бүлмәһендә, бәҙрәфтә һыу үткәргес крандары тирәһен, шулай уҡ иҙәндең барлыҡ мөйөштәрен, вентиляция тишектәрен бор кислотаһына сылатылған мамыҡ менән ышҡып сығырға кәрәк. Кислота аша йүгереп үткән тараҡандарҙың үлемен тиҙләтеү өсөн шул уҡ бор кислотаһы менән ем әҙерләү һәйбәт. Бешкән йомортҡа йәки бәрәңгегә кислота, бер аҙ ғына үҫемлек майы ҡушып, ҡатнашманан бәләкәй генә йомарламдар әүәләргә лә кипкәнсе йылы урынға йәки тәҙрә төбөнә ҡуйып торорға кәрәк. Шунан уларҙы тараҡанлы урындарға (бигерәк тә кухня, йыуыныу бүлмәләре иғтибар үҙәгендә булырға тейеш) урынлаштырабыҙ.

Келәм, мебель аҫтын оҙаҡ йыйыштырмаһаң, урын-ерҙе киптермәһәң, туҙан эсендә хатта бөрсә лә пәйҙә булыуы мөмкин. Бигерәк тә ҡала ерендә беренсе һәм һуңғы ҡаттарҙа йәшәгәндәргә һөжүм итеүсән ул. Шуға күрә өйҙө йышыраҡ йыйыштырып тороу кәрәк. Эт-бесәй кеүек йорт хайуандарын ғына түгел, урын-ергә эләгеп, кешене лә тешләүҙән сирҡанып тормаған был хәшәрәттәрҙе торлаҡҡа индермәҫ өсөн иҙән-плинтустарҙы бер аҙ нашатырь спирты һалынған һыу менән йыуып сығарыу зыян итмәй. Ә инде ингән осраҡта нишләргә?

* Урын-ер бөрсәһе әрем еҫенән ҡурҡа. Был үҫемлектәрҙе түшәк-матрас, мендәр аҫтарына, урын кәрәк-ярағы һаҡланыла торған шкафка урынлаштырырға, уларҙан бәйләмдәр яһап элергә була.

* Ҡан эскес бөжәктәргә ҡаршы көрәштә сәй содаһы һәм тоҙ ҙа ҡулланырға мөмкин. Уларҙы бер тигеҙ күләмдә алып болғатырға ла келәмдәрҙе, шкафтарҙың эсен-тышын шуның менән ышҡырға. Бер тәүлектән һуң саң һурҙырғыс менән таҙартырға. Бер нисә көн уҙғас, йәнә шуны эшләргә.