Бөтә яңылыҡтар
Йәмғиәт
14 Ғинуар 2020, 20:25

Ниндәй мунса һайларға?

Йәйге эҫелә мунса мәсьәләһе әллә ни ҡыҙыҡ түгел кеүек. Ҡышҡы һалҡындар еттеме, ҡайнар мунсаға барып, һөйәктәрҙе йылытып, сихәтле миндек менән сабынып, сәләмәтлекте нығытып алыу берәүгә лә ҡамасауламай.

Йәйге эҫелә мунса мәсьәләһе әллә ни ҡыҙыҡ түгел кеүек. Ҡышҡы һалҡындар еттеме, ҡайнар мунсаға барып, һөйәктәрҙе йылытып, сихәтле миндек менән сабынып, сәләмәтлекте нығытып алыу берәүгә лә ҡамасауламай.

Әммә мунса мунсаға оҡшамай, унан тыш, уның һаулыҡҡа ниндәй йоғонто яһауын да белеп тороу зарур. Йөрәк-ҡан тамырҙары сирҙәренән, юғары ҡан баҫымынан һәм башҡа етди ауырыуҙарҙан яфаланғандар терапевт менән кәңәшләшһә, тағы ла яҡшыраҡ. Ә бөгөн һеҙгә мунса төрҙәре тураһындағы мәғлүмәт тәҡдим итәбеҙ – яраҡлыһын, оҡшағанын һайлағыҙ.

Хамам – төрөк мунсаһы

Парлы мунса, юғары дымлылыҡтағы йомшаҡ режимлы. Инфра-ҡыҙыл нурланыу – 0-50%. Ғәҙәттә, төрлө температуралы биш бүлмәнән тора.

Мунса йолаһы: пар бүлмәһе – йылы һыулы бассейн – пар бүлмәһе – күбекле массаж һәм пилинг – термаль һыулы бассейн – сәй эсеү.

Дауалай: бронхит, астма (ҡурылдай быумаһы), тире сирҙәрен.

Фин мунсаһы

Ҡоро сауна, ҡаты режимдар. Инфра-ҡыҙыл нурланыу – 30-50%. Парланыу һәм ял бүлмәһенән тора.

Мунса йолаһы: 10 минут парланыу – һалҡын һыулы бассейн – ял. Быны бер нисә тапҡыр ҡабатларға мөмкин, тик һәр ҡайһыһында пар бүлмәһендә оҙағыраҡ тороу зарур.

Дауалай: астма (быума), варикоз, тире сирҙәрен.

Рус мунсаһы

Пар бүлмәһе – йомшаҡ йылы менән. Инфра-ҡыҙыл нурланыу – 40-80%. Мунса алды, пар бүлмәһе һәм йыуыныу бүлмәләренән тора.

Мунса йолаһы: йыуыныу – пар бүлмәһе – пар бүлмәһендә миндек менән сабыныу – һалҡын һыу менән ҡойоноу (10-15 секунд), бассейн йәки көрткә сумыу – пар бүлмәһе – йыуыныу бүлмәһендә ял.

Дауалай: ревматизм, подагра сирҙәрен, һалҡын тейеүҙе.

Офуро – япон мунсаһы

Көнсығыш технологиялы мунса, мискәләрҙә – һыу һәм ҡыҙҙырылған таштар, бораҡ. Инфра-ҡыҙыл нурланыу таштарҙы һәм бораҡты ҡулланғанда ғына була.

Ағас мискәнең эсенә йә тышына ҡоростан мейес ҡуйылған. Эҫе һыуҙа парланалар, уға эфир майҙары йә кедр борағын, дарыу үләндәрен ҡушалар.

Мунса йолаһы: мискә (5 минут) – һәндерәлә ял. Артыҡ ауырлыҡтан ҡотолорға теләүселәр япмаға уранып ятһа яҡшыраҡ.
Дауалай: бөйөр, тын алыу юлдары сирҙәрен.

Ирландия мунсаһы

Парланыу бүлмәһе йомшаҡ йылы менән. Инфра-ҡыҙыл нурланыу – 40-80%. Өс төрлө, төрлө температуралы бүлмәләрҙән тора.

Мунса йолаһы: 25-27 градус эҫелектәге бүлмә – 32-35 градус эҫелектәге бүлмә – иҙәненән 60 градус эҫелектәге һауа бөрккән бүлмә – бассейн – ял.

Дауалай: ревматизм, тире ауырыуҙарын.
Гүзәлиә БАЛТАБАЕВА.
Фото: интернет.
Читайте нас в