“Эшләргә дәртебеҙ ҙур әле”, -ти Байғужа ағинәйҙәре

Бынан биш йыл элек барлыҡҡа килгән Байғужа ауылының ағинәйҙәр ойошмаһы бөгөн дә үҙенең көсөн юғалтмай. Тәүҙә алты ғына кеше булһалар, ваҡыт үтеү менән уларҙың сафы ишәйә.

Үҙҙәренең ҡаҙанында ғына ҡайнап йәшәмәй инәйҙәр. Төрлө тарафтарға сығып конкурстарҙа ҡатнашыу ҙа улар өсөн ғәҙәти күренеш. Тәүге сәфәрҙәре Ырымбурға була - “Әбейҙәр сыуағы” конкурсында ҡатнашып, йола күрһәтеп, үҙҙәренә әллә күпме рухи көс, дәрт алып ҡайталар. Йыр-бейеү генә түгел, төрлө музыка ҡоралдарында уйнауға оҫталыҡтары менән дә ал-дыра Байғужа ағинәйҙәре. Береһе мандолинала, икенсеһе ҡумыҙҙа, өсөнсөһө баянда өҙҙөрә. Шуға конкурстарҙа алдынғы урындар яулауҙары ла ғәжәп түгел. Мәҫәлән, былтыр Стәрлетамаҡ районы Айыусы ауылында уҙғарылған “Ҡаһым түрә ҡунаҡҡа саҡыра” конкур-сында ҡатнашып, 3-сө дәрәжә лауреат дипломына лайыҡ булғандар. Тәүге осор фольклор байрамдары уҙғарыу төп йүнәлештәре булһа ла, ваҡыт үтеү менән эш даирәләре лә киңәйә. Ауылда Бөйөк Ватан һуғышы яугирҙарының иҫтәлегенә һәйкәл асыу өсөн дә ағинәйҙәр аҙ көс һалмай.

- Һәйкәл эшләгәндә тыуған ауылына, уның тарихына, халҡына би-тараф булмаған йүнсел йәш егеттәр булыуына инандыҡ. Берҙәмлек менән маҡсатыбыҙға өлгәштек – 2015 йылдың 9 Майында һәйкәл астыҡ, – тип һөйләне ағинәйҙәр. Ярҙамға мохтаж, яңғыҙ йәшәгән оло йәштәгеләрҙе лә иғтибарҙан ситтә ҡалдырмайҙар. Үҙҙәренең өлгөһө аша кешелекле булыу сифаттарын тәрбиәләйҙәр.

Эшләйем тигән кешегә юл асыҡ. Хәҙер ауылдағы бер генә сара ла ағинәйҙәрһеҙ үтмәй тиһәң дә, хата булмаҫ. Һанай китһәң, улар байтаҡ теҙелә - Раҡия Шәрипованың китабының исем туйы, ауылдың һәүәҫкәр композиторы Ринат Иҙелбаевтың ижад кисәһе, ҡорама байрамы, тула баҫыу йолалары һәм башҡа бик күп сараларға ағинәйҙәр тырышлығы һалынған. Әле бына 9 Май байрамына әҙерлек башланған.

Борон-борондан халҡыбыҙҙа кис ултырыу йолаһы булған. Был йо-ланы ла Байғужа инәйҙәре дауам итә. Түшелдерек эшләү, бәйләм эштәренә береһе-береһенә ҡарап оҫталыҡтарын арттыралар. Беҙ барғанда ла улар урындағы ағинәйҙәр ойошмаһы етәксеһе Рәмзиә Йәғәфәрованың йортона йыйылғайнылар. Был өйгә улар айырыуса ҙур дәрт менән килә. Сөнки бында Рәмзиә апайҙың атаһы - ауылдың хөрмәтле аҡһаҡалы, Бөйөк Ватан һуғышы ветераны Наил Солта-нов йәшәй. Уның менән һөйләшеү, кәңәштәрен ишетеү ағинәйҙәр өсөн ҙур мәртәбә. Ҡул эштәре менән ултырған арала яңы йырҙар өйрәнәләр. Ринат Иҙелбаевтың 20-ләгән йырын өйрәнгәндәр. “Тәйрүгем”де, “Байғужам”ды, “Байғужа таҡмаҡтары”н халыҡ та яра-тып өлгөргән.

Йөрәктәрендә эшкә дәрт ҙур Байғужа ағинәйҙәренең. “Клубыбыҙҙың етәксеһе булһа, эшебеҙ тағы ла йәнлерәк барыр ине”, - тигән теләктәрен дә белдерҙеләр. Изге эштәрен хуплап, дәртләндереп ебәргәндә улар тағы ла тырышыбыраҡ эшләргә әҙер.

- Ҡатын-ҡыҙҙар үҙҙәренең донъя йәме, донъя тотҡаһы икәнлеген онотмаһындар ине. Үҙ өлгөләрендә матур балалар үҫтерһендәр. Ә ир-егеттәр уларҙы ҡәҙерләп торһон. Халҡыбыҙҙың бәҫен төшөрмәй, матур итеп йәшәйек, - тигән байрам теләктәрен еткерҙе улар гүзәл заттарға.

Әллә күпме рухи байлыҡ һаҡлана ағинәйҙәребеҙҙә. Тормош тәжрибәһе туплаған ололарҙың әйткәне йәштәргә тормош көткәндә уҡыу әсбабы ул.