Көтмәгәндә шундай ҡыҙҙар осрай!

Көтмәгәндә шундай ҡыҙҙар осрай,

Шундай ҡыҙҙар — ят та үл инде!..

Башҡортостандың халыҡ шағиры Рәми Ғарипов донъялағы иң гүзәл затҡа - ҡатын-ҡыҙға булған кисерештәрен, тәрән тойғоларын ошо шиғыр юлдарына һалған. 8 Март - Халыҡ-ара ҡатын-ҡыҙҙар көнө алдынан беҙ аҫыл ир-егеттәребеҙҙән ике юллыҡты дауам итеүҙәрен һораныҡ. Улар хисләнеп китеп, үҙҙәре уйлап сығарған шиғри юлдарға өҫтәп, гүзәл заттарға йөрәк һүҙҙәрен, изге теләктәрен дә әйтеп ҡалырға ашыҡты.

Әмир СӘФИУЛЛИН, Урман-Бишҡаҙаҡ ауыл Советы хакимиәте башлығы:

- Көтмәгәндә шундай ҡыҙҙар осрай,

Шундай ҡыҙҙар — ят та үл инде!

Мөмкин булһа әгәр ғүмер буйы

Бергә йәшәү насип булһа ине!

Ҡатын-ҡыҙ - ул донъялағы иң изге кеше, изге йән. Ул тормошобоҙ биҙәге, ир терәге. Беҙ, ир-егеттәр, ғаилә усағын һәм именлеген һаҡлаған әсәй- өләсәйҙәребеҙгә, ҡатындарыбыҙға, апай- һеңлеләребеҙгә, ҡыҙҙарыбыҙға, ғөмүмән, бар гүзәл зат вәкилдәренә сикһеҙ мөхәббәтебеҙҙе белдерәбеҙ. Аллы-гөллө сәскәләр, маҡтау һүҙҙәре, ҡиммәтле бүләктәр ҙә аҙ һеҙгә! Беҙ һеҙҙе сикһеҙ яратабыҙ!

Илдар ЗӨЛҠӘРНӘЕВ, РФ Пенсия фондының Ишембай районы һәм Ишембай ҡалаһы идаралығы начальнигы:

- Көтмәгәндә шундай ҡыҙҙар осрай,

Шундай ҡыҙҙар — ят та үл инде!

Һине күргәс тыуған кисерештәрҙе

Үҙең генә бел дә, той инде!

Минең күңелемдә һөйөү уты кинәт кенә ҡабынды ла мәңгелеккә тороп ҡалды. Әлшәй ҡыҙы Илүзәм менән бергә бәхетле йәшәүебеҙгә - 40 йыл. Ҡатын-ҡыҙ - минең өсөн әсәйем, ҡатыным, ҡыҙым, ейәнсәрем. Бәхетлемен, улар минең өсөн донъяла бар нәмәнән ҡәҙерлерәк. Изге теләктәрем: һәр ваҡыт матур, һөйкөмлө, сибәр булһындар, беҙҙе яратһындар, һаҡлаһындар, яҡлаһындар, йылмайып-көлөп торһондар һәм бер ваҡытта ла ҡартаймаһындар!

Вәли ҒӘЛИЕВ, Сәлих мәктәбе уҡытыусыһы:

- Көтмәгәндә шундай ҡыҙҙар осрай,

Шундай ҡыҙҙар — ят та үл инде.

Ҡыҙҙар миңә хәҙер ҡарамайҙар,

Ятып илаһаң да һуң инде!

Ә шулай ҙа Гүзәл заттар, ярыш атлағыҙ һеҙ,

Булығыҙ гел таяныс-терәк.

Ниндәй генә юлдан атлаһаҡ та

Тормошта һеҙ беҙгә бик кәрәк!

Мөхәммәт ИҘРИСОВ, почетлы шахтер, Тирмән-Йылға ауылы:

- Көтмәгәндә шундай ҡыҙҙар осрай,

Шундай ҡыҙҙар — ят та үл инде!

Мәрзиәмә булған һөйөүөм

Ғүмерлеккә булды ла инде!

Һарғай ауылының иң сибәр ҡыҙына тәү күреүҙә ғашиҡ булдым. Клуб иҙәндәрен дер һелкетеп бейеүҙәре әле һаман күҙ алдымда. Йылдар үткән һайын, һөйөклөмә булған мөхәббәтем, уға булған йылы хистәрем арта ғына бара. Бер ул, ике ҡыҙ бүләк итеүенә рәхмәт. Яңы ғына кәләш алған ир-егеттәргә теләгем шул: ҡатындарығыҙҙы күтәреп кенә йөрөтөгөҙ, иркәләп-наҙлап ҡына тороғоҙ!

Азат ҒӘББӘСОВ, нефтсе:

- Көтмәгәндә шундай ҡыҙҙар осрай,

Шундай ҡыҙҙар — ят та үл инде.

Себер яҡтарынан һағынып ҡайтып,

Бер күреү - бәхет инде.

Алыҫ яҡтарҙан ҡатынымды, улымды бик һағынып ҡайтам. Буш ваҡытымды ҡәҙерлеләрем менән үткәрергә тырышам. Форсаттан файҙаланып, минең эштән иҫән-һау ҡайтыуымды ике күҙен талдырып көтөп тороусы әсәйемде, кәләшемде, донъяның бар гүзәл заттарын матур байрам менән ҡотлайым! Һәр берегеҙгә һаулыҡ теләйем!

Фото: pixabay.com

Читайте нас:

Регистрационный номер ПИ ТУ02-01361. Свидетельство выдано Управлением Федеральной службы по надзору в сфере связи, информационных технологий и массовых коммуникаций по Республике Башкортостан от 24.07.2015 г.

Новости, статьи, другие публикации, а также фото-, видео-, графические материалы являются объектами авторского и исключительного права газеты «Торатау». Перепечатка допускается только по согласованию с редакцией. Ссылка на авторство газеты «Торатау» обязательна. Для интернет-изданий прямая активная гиперссылка на сайт газеты «Таратау» обязательна.

Телефон

8(34794) 2-68-45

Электрон почта

[email protected]

Адресы

453200, город Ишимбай, ул. Советская, 88

Реклама хеҙмәте

8(34794) 4-11-22, 8-917-45-44-640

Редакция

8(34794) 2-68-45

Ҡабул итеү бүлмәһе

8(34794) 3-22-75

Хеҙмәттәшлек

8(34794) 3-22-75