ИЛДУСТЫҢ ҠЫҘЫ

Өйләнешкәндә икебеҙгә лә 19-ар йәш ине, бер йәш араһы менән генә тыуған Иҙел һәм Урал улыбыҙ менән бергә үҫтек – атай-әсәй ҙә, ир менән ҡатын булараҡ та, - ғаиләһе хаҡында һөйләгәндә йөҙөнән нур, күңеленән моң ағылып торғандай Ләйсәндең. – Районда атай-әсәйемде күптәр белә, әсәйем Нәсимә Ғайса ҡыҙы - Этҡол ауыл биләмәһе хакимиәте башлығы, әммә мин - күберәк Илдус ҡыҙы. Атайым данлыҡлы һунарсы, бәләкәйҙән ул ҡайҙа – мин шунда. Илдустың “малайы” тип юҡҡа әйтмәгәндәрҙер, ғаиләлә апайым да мин, атай-әсәйҙең ул теләүе холҡомда сағылған, күрәһең. Мәктәп тамамлар ваҡыт еткәс, ауылдан ситкә китеү, тыуған йорттан айырылыу уйы шул тиклем ауыр тойолдо – бер ҡайҙа ла бармайым, уҡымайым, һинең һымаҡ урман ҡыҙырып йәшәйем тип, бер килке атайға тиҫкәреләшеп тә алдым. Уның һабырлығы, оло йөрәге өсөн мин ныҡ рәхмәтле. Уҡымай буламы ни, БДУ-ның филология факультетын уңышлы тамамланым. Ә бына шул ике күҙе урман-да булған ҡырағай ҡыҙҙы Денис алыштырҙы ла ҡуйҙы. Ауылға олатаһы-өләсәһенә ялға ғына ҡайтып йөрөгән ҡала малайы миндә нимә тапты икән, тип аптырағайным тәүҙә...

Эйе, кәрәк икән һыбай елгән, мылтыҡ алып ҡаргиҙәргә ултырған Ләйсәндә, үҙе әйткәнсә, тап мөхәббәте ҡатын-ҡыҙға хас иң матур сифаттарҙы аса. Бөгөн үҙҙәрен ҡыуып үҫеп килгән малайҙарына, сәскә кеүек ҡыҙҙары Дианаға (һунарсылыҡ алиһәһе исеме юҡҡа һайланмаған!) ҡарап, йәштән табышҡан мөхәббәтле парға һоҡланмау мөмкин түгел. Тағы шуныһы ихти-рам уята – ошо бәхеттәренең ҡәҙерен беләләр.

- Атайымды ныҡ уллы итке килде, Аллаға шөкөр, хәҙер ейәндәре, ейәнсәрҙәре үҫә. Ҡыҙың ирҙән уңһа, кейәүең ул була, тигән әйтем дә бик дөрөҫ. Денистың күп нәмәләрҙә атай-ыма - ҡайныһына оҡшай барыуын күрәм. Ике яҡлап та атай-әсәйҙәр беҙгә ныҡ терәк, йәшләй үҙебеҙ күп нәмәне белеп, аңлап еткермәгәндә улар кәңәше алтынға торош булғанын әле аңлайбыҙ, - ти ғаилә бәхетен бар нәмәнән өҫтөн ҡуйған һылыу замандашыбыҙ.

Денис “Газпром нефтехим Салауат” заводында өлкән опе-ратор, Ләйсән Ишембайҙағы ҡыҙҙар өсөн махсус уҡыу-тәрбиә учреждениеһында тәьминәт буйынса әйҙәүсе белгес булып эшләй. Бер-береһе, балалары өсөн йән атып торған парҙың хыялдары ҙур, уртаҡ. Килешерһегеҙ, тап ошондай йәштәр иңендә бөгөн иң яуаплы бурыс – милләтте ҙурлау, ишәйтеү!