Һай, тракторист ул үҙе, кәрәк булһа, гармонист!

Алты балалы ғаиләлә икенсе бала булып донъяға килгән Әхәт ағайға, атаһы һәм оло ағаһы һуғышҡа киткәс, туғандары һәм әсәһенә терәк кенә түгел, ә ғаиләне туйҙырыусы, хәстәрләүсе булырға тура килә. Башта үҫмерҙе колхозда тракторсы, комбайнсы ярҙамсыһы итеп ҡуялар, һуңғараҡ, һәләтен күреп, үҙенә лә техника ышанып тапшыралар. Баһадир кәүҙәле егет бар ерҙә лә һынатмай, һабантуйҙарҙа һарыҡ һәр ваҡыт уның иңендә була.

Совет Армияһының диңгеҙ флотында 5 йыл хеҙмәт итеп ҡайтҡандан һуң, ауылдың беренсе гармунсыһы Әхәт ағай һандуғас тауышлы Зәйтүнә апай менән яҙмышын бәйләй. Улар икәүләп ғүмер буйы сәхнә түрендә булды. Йыр-моңға булған һөйөүҙәре алты ҡыҙына ла күскән. Хәҙерге көндә бәхетле олатайҙың 14 ейән-ейәнсәре, 17 бүлә-бүләсәре бар. Ҡыҙғанысҡа ҡаршы, Әхәт ағайҙың Зәйтүнә апайҙы юғалтыуына ла 4 йыл булып китте.

40 йылдан ашыу колхозда комбайнсы, тракторсы, механик, тракторсылар бригадаһы бригадиры булып эшләп, ауылдаштар араһында ҙур ихтирам ҡаҙанған кеше ул Әхмәт Нәғим улы. Тырыш хеҙмәте өсөн III дәрәжәле Хеҙмәт даны ордены менән бүләкләнгән. Хаҡлы ялға сыҡҡас та, тик ултырырға яратмай, үҙ ҡулдары менән ике бәләкәй трактор йыйған. Әле өсөнсөһөн йыйыу өҫтөндә (фотола). “Төнө буйы башымда тракторҙың схемаһын һыҙам да, иртән сығып эшкә тотонам. Ауылда тракторһыҙ йәшәп буламы ни? Балаларыма, ейәндәремә минән трактор ҡалһын, тип тырышам”, - ти ул.