Ярҙамға өмөт йөрөтә кешене

Шәхсән һорауҙары менән ҡабул итеүгә тиҫтәгә яҡын кеше яҙылғайны. Һорауҙар төрлө өлкәгә ҡағылды, әммә уларҙың һәр береһен ведомство-ара хеҙмәттәшлек нигеҙендә, республика, федераль кимәлдәге төрлө социаль программаларҙы кеше файҙаһына ҡуллана белгәндә, хәл итеп булырлыҡ.

Ишембай ҡалаһында Чернобыль ветеран-дары союзын етәкләүсе Илдар Абдуллин, мәҫәлән, дәүләт тарафынан был категория ветерандарына бирелгән льготаларға таянып, асыҡ һатыу ойоштормай ғына ерҙе арендаға алып булмаҫмы, тигән һорау менән мөрәжәғәт итте. Азамат Абдрахман улы, ветерандың йәмәғәт эшен алып барыуына рәхмәт белдереп, милек менән идара итеү комитеты белгестәре менән берлектә уның һорауын ентекле ҡарау талап ителеүен әйтте, айырым осрашыуға көнө лә билдәләнде. Ташламалар булған осраҡта ла, ер законлы нигеҙҙә бүленергә, процессуаль яҡтан ҡануниәт үтәлергә тейеш.

Етәкселеккә тәҡдимдәре менән дә килеүселәр булыуы иғтибарға лайыҡ. Үҙен ирекмән (волонтер) тип танытҡан Ирина Усманова республика музейҙары менән хеҙмәттәшлек итеүе, һаҡсыл ҡараш булғанда Ишембайға ҡағылышлы тарихи экспонаттар менән ярҙам итә алыуы хаҡында әйтте.

Стәрлетамаҡтан “Идельстрой” яуаплылығы сикләнгән йәмғиәте директоры Рөстәм Шәймөхәмәтов Ишембай районы биләмәһендә бәшмәк үҫтереү менән бәйле эшҡыуарлыҡ эшен асырға әҙер булыуын әйтте. Инвестициялар һалырға ла әҙер. Ҡулланыусылар баҙары, хеҙмәттәр һәм эшҡыуарлыҡ бүлеге тарафынан уның тәҡдиме өйрәнелгән, эш башлар өсөн бинаға бәйле мәсьәләне лә ыңғай хәл итеп буласаҡ.

- Һеҙҙең кеүек эшҡыуарҙарға ҡулдан килгәнсә ярҙам итергә әҙербеҙ. Беҙҙең районда теркәлегеҙ. Республика Башлығы вазифаһын ваҡытлыса башҡарыусы Радий Хәбировтың да был өлкәгә иғтибарын, беҙҙән бергәләп һөҙөмтәгә эшләүҙе талап итеүен күрәһегеҙ. Ишембай районының эшҡыуарлыҡ эшмәкәрлеген алып барыу өсөн уңайлы шарттар булған иҡтисади зона итеп һайланыуы ла беҙгә ҙур яуаплылыҡ өҫтәй. Беҙҙә бизнес үҙен яҡшы тойорға тейеш, - тине Азамат Фәрит улы. Продукцияғыҙҙың беренсе партияһын тәмләтергә онотмағыҙ, тип тә шаяртыу ҡатыш әйтеп ҡуйҙы. Әлбиттә, районда урынлашҡан подвал тибындағы бинаны әле етди ремонтлайһы, ҡорамалдар алаһы бар. Иң мөһиме – эшҡыуар бөгөндән эшкә тотонорға әҙер.

Тимер юлы ҡасабаһынан килгән бер төркөм хаҡлы ялдағы апайҙар күтәргән мәсьәлә хакимиәттең капиталь төҙөлөш бүлеге белгестәренең иғтибар үҙәгендә. 2017 йылда авария хәлендәге тип танылған бер нисә йортта йәшәүселәр яңы торлаҡҡа күсерелеүҙәрен көтә. Бүлек етәксеһе Дарик Ҡорбанов уларҙың 2019 йылда авария хәлендәге һәм иҫкергән торлаҡтан күсереү буйынса федераль программаға мотлаҡ эләгәсәктәрен, тик бер аҙ көтөргә кәрәк буласағын әйтте.

- Әлбиттә, яңы торлаҡлы булғансы һеҙҙең йорттар ҡараған идаралыҡ тейешле саралар күрергә тейеш. Ҡарҙан ҡыйыҡ ишелергә тора, һыу үтә тигән мөрәжәғәт нисек иғтибарһыҙ ҡалырға мөмкин?! – тип, Азамат Фәрит улы ҡала биләмәһе башлығына идарасы компания менән берлектә хәлде төҙәтергә ҡушты.

Яңғыҙы өс бала тәрбиләгән әсәгә лә ярҙам буласаҡ. Ҡатын алименттан ҡасыусы иренә бәйле юристар ярҙамына, ваҡытлыса торлаҡҡа мохтаж. Күп балалы әсә булараҡ, Кузьминовканан бүленгән ерҙә башлаған йортон нисек тә төҙөп бөтөүгә өмөтләнә ул.

Граждандарҙы ҡабул итеү барышындағы һәр мөрәжәғәт, ниндәй өлкәгә ҡағылыуына ҡарап, бүлек, ведомство етәкселәренә шәхсән беркетелде.