Сибай балалары - Ишембайҙа

Улар ике аҙна самаһы дауамында бында һаулыҡтарын нығытасаҡ. Ишембай районы муниципаль районы хакимиәте башлығы вазифаһын башҡарыусы Азамат Абдрахманов, балаларҙы ҡаршылап, улар менән аралашты, кәйефтәре менән ҡыҙыҡһынды. Алыҫ юлдан килһәләр ҙә ҡыҙҙар һәм малайҙарҙың күңелдәре күтәренке, ихлас аралаштылар. Азамат Фәрит улы шифаханала уларҙы ҡыҙыҡлы ял көтөүен белдерҙе. Ишембай командаһы менән спорт ярыштары уҙғарырға ла тәҡдим итте. Сибай үҫмерҙәре был фекерҙе күтәреп алып, футболда көс һынашырға теләүҙәрен әйтте. Эргәлә генә саңғы базаһы булыуын күҙ уңында тотоп, хакимиәт башлығы вазифаһын башҡарыусы ундағы мөмкинлектәрҙе лә атаны. “Матур итеп ял итегеҙ, оҡшаһа тағы ла килерһегеҙ”, - тине ул.

Балалар менән танышырға райондың мәғариф, һаулыҡ һаҡлау, физкультура, спорт һәм туризм, башҡа тармаҡ етәкселәре килгәйне. Улар алдына ла балаларҙың ялын юғары кимәлдә ойоштороу бурысы ҡуйылды.

Сибайҙан килгән 50 ҡыҙ һәм малайҙың 41-е - мәктәп уҡыусылары, уларҙың 18-е, йәғни 4-се класҡа тиклемге уҡыусылар, шифахана бинаһында уҡыясаҡ, ҡалғандары 15-се мәктәпкә автобус менән йөрөтөләсәк. Әлбиттә, төп иғтибар балаларҙың сәләмәтлеген нығытыуға йүнәлтеләсәк.

- Улар дауалау физкультураһына, мас-сажға, дарыу үләндәре менән ингаляцияға, тоҙ шахтаһына һәм башҡа төрлө дауалау-һауыҡтырыу процедураларына йәлеп ителәсәк. Ҡала буйлап экскурсиялар ойоштороласаҡ, спорт һәм мәҙәни сараларға ла көндәре бай буласаҡ, - тине шифаханала баш табип вазифаһын башҡарыусы Мәрйәм Ғилметдинова.

Ғөмүмән, бында йәшәү шарттары яҡшы, бүлмәләр матур, алты тапҡыр ашатыу ҡаралған. Шуға Сибайҙан килгән ҡыҙ һәм малайҙар Ишембайҙы ла, шифахананы ла үҙ итер, һаулыҡтарын нығытып, тыуған ҡалаларына яҡшы кәйеф менән ҡайтыр.