Хаҡлы ялға - хөрмәт менән

Кешене намыҫлы хеҙмәте биҙәй. Хеҙмәт яратҡандар тормошта ла юғалып ҡалмай. Күңел һалып башҡарған эшеңдең һөҙөмтәһе лә матур була. Ошо көндәрҙә Ишембай районы һәм Салауат ҡалаһының ветеринария станцияһы коллективы оҙаҡ йылдар эшләгән ветеринарҙарын ҙур ихтирам менән хаҡлы ялға оҙатты.

Уларҙың береһе - Фәйрүзә Ғәлиуллина 37 йыл ғүмерен ошо өлкәгә бағышлаған. Ә хеҙмәт юлын башлаған мәле әле генә һымаҡ.

- Әсәйемдең бер туған һеңлеһе ветеринар ине, бәләкәй саҡта апайыма эйәреп, уның эш халатын кейеп, малдар эргәһендә йөрөргә яраттым. Шулай ошо һөнәргә ҡыҙыҡһыныу барлыҡҡа килгәндер инде. Ғөмүмән, мин бала саҡта уҡ ауыл хужалығында эшләргә хыялландым. Киләсәгемде ауылдан башҡа күҙ алдына ла килтерә алманым, хыялым тормошҡа ашты, - ти хеҙмәт ветераны.

Стәрлетамаҡ совхоз-техникумын тамамлағас, “Коммунизм” колхозында фельдшер булып эш башлай ул. Һәм шул осорҙан башлап ошо изге һөнәргә тоғролоҡ һаҡлай. Һуңғы 11 йылда Сәлих ветеринар участкаһы мөдире вазифаһын башҡара. Ветеринар эше бигерәк тә ҡатын-ҡыҙ өсөн еңелдән түгел. Өйҙән-өйгә йөрөп малдарға әле прививка яһарға, әле диагностик тикшеренеүҙәр уҙғарырға кәрәк.

- Йылына йорттарҙы 5-6 тапҡыр әйләнеп сығабыҙ. Беҙҙең ҡарамаҡтағы шәхси хужалыҡтағы һыйыр малдары ғына - 1500 баш. Эшебеҙҙә мал хужалары менән уртаҡ тел таба белеү мөһим. Үткәрелгән иҫкәртеү сараларының әһәмиәтен матурлап аңлата белһәң, халыҡ та тыңлай. Хеҙмәт осоромда бер ҡасан да ауылдаштарым менән һүҙгә килешкәнем булманы. Коллективым, етәкселәрем дә һәр ваҡыт һәйбәт булды. Тырышлығыңды күрә белеүҙәре ҡыуаныслы. Йәштәргә теләгем: һөнәр һайлағандар икән – хеҙмәт итһендәр. Еңел эш, күп аҡса бер ҡайҙа ла юҡ, - тигән матур теләктәрен дә әйтте Фәйрүзә Рәхмәтулла ҡыҙы. Хеҙмәт тәмен тоя белгәндәр – бәхетле кешеләр. Үткәндәргә ҡараһаң, ғорурланып иҫләрлек матур йылдар ҡалған. Петровск участка ветеринария дауаханаһының мөдире Алексей Пановты ла хеҙмәттәштәре был көндө хаҡлы ялға оҙатты. Ул да заманында ветеринар һөнәренә эйә булып, йәшләй генә ошо эшкә егелгән.

- Йәшләй генә эш башлап, һөнәрҙәренә тоғро ҡалып ғүмер буйы ветеринарияға хеҙмәт иткән Фәйрүзә Рәхмәтулла ҡыҙы менән Алексей Гаврилович оло маҡтауғалайыҡ. Улар икеһе лә йәштәр өсөн өлгө. Үҙ эшенә яуаплы ҡараған, тырыш хеҙмәткәрҙәребеҙҙе хаҡлы ялға оҙатыу бер аҙ моңһоу ҙа булып тора, - тине ветеринария станцияһы начальнигы Ғайзулла Дәүләтов уларға иҫтәлекле бүләктәр тапшырып.

Йылдар үтә. Алмашҡа яңы быуын килә. Үҙ эшеңде намыҫлы башҡарыу - ололарҙан аманат булып быуындан-быуынға күсә.