Ә һеҙҙең мал тамғаланғанмы?

Этҡол һәм Уразбай ауылдарында халыҡ йыйылыштары булып үтте. Көн тәртибендә ҡаралған мәсьәләләрҙең береһе малдарҙы биркалауға ҡағылышлы булды. Ишембай районы һәм Салауат ҡалаһының ветеринария станцияһы начальнигы Ғайзулла Дәүләтов, Башҡортостан Республикаһы дәүләт ветеринария надзорының Мәләүез территориаль бүлеге дәүләт ветеринар инспекторы Анна Елистратенко халыҡҡа мал аҫрауҙағы яңы ҡағиҙәләрҙе, талаптарҙы аңлатты.

Аттарҙы, һыйыр малдарын, ҡош-ҡортто, эт- бесәйҙәрҙе биркалау йәки чип ҡуйыу тураһындағы хәбәрҙе ишетмәгән кеше юҡтыр. Биркалау - малдар һанының теүәл иҫәбен алып барыу маҡсатында күрелгән сара. Номерланған һәр мал компьютерға индерелә, уға ниндәй вакцина, диагностика тикшеренеүҙәре үткәрелеүе тураһында мәғлүмәттәр күрһәтелә барасаҡ. Шуныһы ла мөһим, төрлө хәүефле сирҙәргә ҡаршы вакцина ла ошо биркаланған малдар һанына ҡарап бүленәсәк.

- Шуға ниндәйҙер сәбәп менән кемдеңдер малы биркаланмай ҡалған икән, кисекмәҫтән ветеринарҙарға мөрәжәғәт итегеҙ, - тине Анна Николаевна.

Малдарҙы номерлау буйынса сараларҙы апрелгә тиклем теүәлләү бурысы ҡуйылған. Ошо маҡсатта ветеринарҙар бөгөнгө көндә ҡыҙыу эш алып бара.

Йыйылышта малдар араһындағы төрлө ҡурҡыныс сирҙәр хаҡында ла һүҙ барҙы. Уларҙың Ишембайҙа килеп сығыу хәүефе лә ҙур, шуға ла һәр кем һаҡлыҡ сараларын күрергә, уяу булырға тейеш.

- Ветеринар документһыҙ мал алмағыҙ, уның сирле булыу ихтималлығы ҙур, - тип иҫкәртте ветеринария станцияһы начальнигы Ғайзулла Дәүләтов.

Шулай уҡ баҙарҙа һөт, һөт ризыҡтары һатыу тәртибе лә йәнә бер ҡат аңлатылды.

Ғөмүмән, ветеринарҙар алып барған иҫкәртеү саралары төрлө сирҙәр таралыуына юл ҡуймауға, малдар сәләмәтлеген хәстәрләүгә йүнәлтелгән. Халыҡтың белгестәргә үҙҙәрен борсоған һорауҙарын биреүе, уларға ентекле яуап алыуы менән файҙалы булды ауылдарҙағы осрашыу.

Йыйылышта ауыл көнкүрешенә ҡағылышлы башҡа мәсьәләләр ҙә тикшерелде. Урындағы хакимиәт башлығы Нәсимә Әйүпова ҡаты-көнкүреш ҡалдыҡтарын сығарыу буйынса яңы тәртип тураһында һөйләне. Быға тиклем сүп-сарҙы тоҡтарға йыйып тапшырһалар, хәҙер ул ауылда контейнерҙарға йыйыласаҡ. Һауыттарҙы ҡайһы урынға ҡуйыу мәсьәләһен халыҡ бергәләп хәл итте. Йорттарҙың тирә-яғындағы тәртип, ҡоймаларҙың төҙөклөгөнә лә иғтибар йүнәлтелде. Мал көтөүен ойоштороуға, маршрут автобустарының йөрөүенә ҡағылышлы һорауҙарға ла асыҡлыҡ индерелде.