Тәүге көндө улар район хакимиәте бинаһында түңәрәк өҫтәл ойошторҙо. Унда һүҙ тәбиғәт һәйкәлдәре Торатау, Йөрәктау хаҡында барҙы. Был тауҙарҙың үҙенсәлеге, уникаллеге тураһында бик күп ҡыҙыҡлы мәғлүмәттәр килтерелде. Мәҫәлән, Рәсәй Фәндәр Академияһының Өфө биология институты директоры Василий Мартыненко, Шихан тауҙарының һирәк осрай торғай үҫемлектәргә бай булыуын билдәләп, миҫалдар килтерҙе. Геопарк биләмәһенә Торатау менән Йөрәктау ғына түгел, ә райондың башҡа уникаль тәбиғәт объекттарының да инәсәген билдәләне. Түңәрәк өҫтәлдә һөйләшеү йәнле барҙы. Геопарк булдырғанда халыҡтың боронғо шөғөлдәрен, йолаларын күтәреүгә иғтибар бирергә кәрәк тигән урынлы тәҡдимдәр яңғыраны.