Осрашыуҙар дауам итә

Ишембай районы муниципаль районы хакимиәте башлығы Марат Ғайсиндың ауылдарҙа халыҡ менән сираттағы осрашыуы Әхмәр һәм Ҡарайғанда үтте. Шулай уҡ унда хакимиәттең төрлө тармаҡ буйынса яуаплы белгестәре лә ҡатнашты.

Әхмәр ауылындағы сараға халыҡ айырыуса күп килде. Башта фойела һәр кем үҙенең һорауына яуап алып ҡалырға тырышты. Артабан осрашыу залда дауам итте. Дөйөм йыйылыш ауыл хакимиәте башлығы Гөлнара Кәримованың ауыл Советы буйынса былтыр башҡарылған эштәрҙе йомғаҡлауҙан башланды. Төҙөкләндереүгә килгәндә, “Башҡортостан Республикаһында заманса ҡала мөхитен формалаштырыу” федераль программаһы буйынса үткән йылда Әхмәр һәм Ишәй ауыл мәҙәниәт йорттары биләмәләрендә ял парктары булдырылған. Әхмәрҙә Һәләүек йылғаһы аша күпер ремонтланған. Ишәй, Әхмәр, Ҡанаҡай ауылдарында урамдарҙы яҡтыртыу буйынса саралар күрелгән. Тик был йәһәттән теүәлләйһе эштәр бар әле. Үткән йыл Әхмәр клубы, республика грантына лайыҡ булып, 100 мең һумға сәхнә өсөн шаршауҙар, принтер, кинопроектор алынған. Ишәй клубының тамаша залын һәм электр менән тәьмин ителеште капиталь ремонтлауға проект-смета документацияһы әҙерләнгән һәм ыңғай экспертиза алынған. Ишәй, Әхмәр, Ҡанаҡай, Восток, Яңы Ауыл, Октябрь, Карасевка, Үрнәк ауылдарының генераль пландары эшләнгән. Әлеге көндә был ауылдарҙы киңәйтеүгә планировка һәм межалау проекты буйынса эш алып барыла. Ер участкаһын бушлай алыуға льготалылар сиратында 126 кеше тора, Әхмәр ауылында ундайҙарҙың һаны – 68. Быйылғы йылға ҡуйылған төп маҡсаттар рәтендә – Әхмәр клубының тамаша залын ремонтлауға проект-смета документацияһына экспертиза үткәреү, сүплектәрҙе бөтөрөү, зыяраттарҙы, урамдарҙы төҙөкләндереү, ауылдарға урам яҡтыртҡыстары ҡуйыу.

- Ауылда “Гөлнәзирә” вокал коллективын ойоштороп матур ғына эш башланыҡ, костюмдар тектерҙек. Сығыш яһар өсөн сәхнә кәрәк, - тине ул.

Ауылдан сүп сығарыу тәртибе менән ҡыҙыҡһыныусылар ҙа булды. Әйткәндәй, ҡаты көнкүреш ҡалдыҡтарын сығарыу буйынса Ҡарайғанда бер нисә йыл инде эш көйлө генә алып барыла. Әле ҡышҡы осорҙа айҙың беренсе һәм өсөнсө йәкшәмбеһендә сүпте килеп алһалар, яҙҙан башлап аҙна һайын алып китәсәктәр. “Бер нисә урынға сүп йыйыу өсөн контейнерҙар ҡуйыу мәсьәләһе тора. Шулай уҡ элекке сүплекте таҙартаһы

бар”, - тине ауыл хакимиәте башлығы Әмир Сәфиуллин.

Торатау буйында “Ырыуҙар ташын” ҡуйыу, йорт төҙөү өсөн ер алыу, яңғыҙ йәшәгән оло йәштәгеләргә ихаталарын ҡарҙан көрәү буйынса ярҙам күрһәтеү һәм башҡа төрлө һорауҙар борсоно ҡарайғандарҙы.

Йәшәгәс, проблемалар булмай тормай, уларҙы ваҡытында күтәреү һәм хәл итә белеү мөһим бөгөн.